பெண்கள் வெளிநாட்டு வேலைக்கு செல்வதைத் தடுக்கும் விதிமுறைகளை மீண்டும் கொண்டு வர வேண்டும்!

ஐந்து வயதுக்குட்பட்ட குழந்தைகளை கொண்ட பெண்கள் வெளிநாட்டு வேலைக்கு செல்வதைத் தடுக்கும் விதிமுறைகளை மீண்டும் கொண்டு வர வேண்டும் என்று பெண்கள் மற்றும் குழந்தைகள் விவகார இராஜாங்க அமைச்சர் கீதா குமாரசிங்க தெரிவித்துள்ளார்.

 இதுதொடர்பில் கருத்து தெரிவித்த இராஜாங்க அமைச்சர் குமாரசிங்க, சிறு குழந்தைகளை கொண்ட பெண்களை வேலைக்காக புலம்பெயர்வதற்கு அனுமதிக்கும் தற்போதைய விதிமுறைகள் குழந்தைகளுக்கு அநீதியானது. "இது மிகவும் நியாயமற்றது என்று நான் நினைக்கிறேன். இரண்டு வயதுக் குழந்தைக்குப் பேசத் தெரியாது, தனியாக எதையும் செய்ய முடியாது. அவர்கள் பாதுகாப்பான கைகளில் இல்லை. 

எனவே, இதுபோன்ற சிறு குழந்தைகளைக் கொண்ட பெண்கள் தங்கள் குழந்தையை விட்டு வேலைக்குச் செல்ல வேண்டாம். குறைந்த பட்சம் குழந்தைக்கு ஐந்து வயது வரை காத்திருக்க வேண்டும்,” என்று குமாரசிங்க விளக்கினார். "இது எனது தனிப்பட்ட கருத்து மற்றும் வயது வரம்பை மாற்றியமைக்க வேண்டும் என்று நான் கோருகிறேன்," என்று அவர் மேலும் கூறினார்.

 2022 இல், தொழில் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார, ஒழுங்குமுறை திருத்தம் கோரி அமைச்சரவைப் பத்திரத்தை சமர்ப்பித்தார். பெண் புலம்பெயர்ந்த தொழிலாளர்களுக்கான குடும்ப பின்னணி அறிக்கை (FBR) தேவையை ஓரளவு தளர்த்துவதற்கான அமைச்சரவையின் முடிவு இலங்கையிலிருந்து பெண் தொழிலாளர் குடியேற்றத்தை ஊக்குவிப்பதற்கான ஒரு சாதகமான நடவடிக்கையாக வரவேற்கப்பட்டது.

 ஐந்து வயதுக்குட்பட்ட குழந்தைகளைக் கொண்ட பெண்களைத் தடுக்க ஜூன் 2013 இல் அறிமுகப்படுத்தப்பட்ட FBR பாரபட்சமானது என்றும், தொழிலாளர்களின் ஆவணமற்ற இடப்பெயர்வை ஊக்குவிக்கிறது என்றும் கொள்கையின் விமர்சகர்கள் வாதிட்டனர். ஆரம்பத்தில், FBR பெண் வீட்டுப் பணியாளர்களுக்கு மட்டுமே பொருந்தும், ஆனால் ஒகஸ்ட் 2015 இல், அனைத்து பெண் புலம்பெயர்ந்தோரையும் உள்ளடக்கியதாக நீட்டிக்கப்பட்டது.

 இராஜாங்க அமைச்சர், தொழில் மற்றும் வெளிநாட்டு வேலைவாய்ப்பு அமைச்சுடன் பேச்சுவார்த்தை நடத்துகிறாரா என்று கேட்ட பொழுது, பெண்கள், சிறுவர் விவகாரங்கள் மற்றும் சமூக வலுவூட்டல் அமைச்சரும் ஜனாதிபதியுமான ரணில் விக்கிரமசிங்கவுடன் இது குறித்து கலந்துரையாடவுள்ளதாக குமாரசிங்க தெரிவித்தார். “ஜனாதிபதி தனது வெளிநாட்டுப் பயணத்தை முடித்துக் கொண்டு நாடு திரும்பியதும், இந்த விவகாரத்தை நான் அவரிடம் எடுத்துரைப்பேன்,” என்று அவர் கூறினார்.

 நீதியமைச்சர் விஜயதாச ராஜபக்சவிடம் இந்த விடயத்தை தொடர்வதற்கு தயாராக இருப்பதாக குமாரசிங்க தெரிவித்தார். இராஜாங்க அமைச்சர் குமாரசிங்க தனது விதிமுறைகளை மீளாய்வு செய்வதற்கான கோரிக்கையை தெரிவித்தாரா என வினவியபோது, ​​அமைச்சர் நாணயக்காரவின் ஊடகச் செயலாளர், அவ்வாறான தகவல்தொடர்புகள் எதுவும் இடம்பெறவில்லை எனவும், அது தொடர்பில் அமைச்சரிடம் கலந்துரையாடவில்லை எனவும் தெரிவித்தார்.

 வெளிநாட்டில் வேலை தேடும் குழந்தைகளைக் கொண்ட பெண்களுக்கான குறைந்தபட்ச வயதுத் தேவை குறித்து பாராளுமன்ற மட்டத்தில், பாலின சமத்துவத்திற்கான பாராளுமன்றத் தெரிவுக்குழு தேவையான பரிந்துரைகளைச் செய்யக் கோரியது. 

 அமைச்சரவை தீர்மானத்தை மீள்பரிசீலனை செய்யுமாறு தொழிலாளர் மற்றும் வெளிநாட்டு வேலைவாய்ப்பு அமைச்சிடம் கடந்த காலங்களில் பெண் பாராளுமன்ற உறுப்பினர்கள் பேரவையின் கலாநிதி சுதர்ஷினி பெர்னாண்டோபுள்ளே கோரிக்கை விடுத்திருந்தார். குழந்தையின் வாழ்க்கையின் முதல் ஐந்து ஆண்டுகளில், குறிப்பாக தாய் இல்லாத நிலையில், குழந்தைகளின் உகந்த உடல் மற்றும் மன வளர்ச்சி மோசமாக பாதிக்கப்படும் என்று அவர் கூறினார்.