ரஷ்யாவுக்காக உளவு பார்த்ததாக சந்தேகிக்கப்படும் அமெரிக்க ராணுவ வீரர் இங்கிலாந்தில் கைது

ரஷ்யாவுக்காக உளவு பார்த்ததாக சந்தேகத்தின் பேரில் அமெரிக்க ராணுவ வீரர் ஒருவர் கைது செய்யப்பட்டுள்ளதாக பிரிட்டிஷ் பயங்கரவாத எதிர்ப்பு காவல்துறை தெரிவித்துள்ளது.

41 வயதான மூத்த ராணுவ வீரர் ஒருவர் குளோசெஸ்டர் அருகே கைது செய்யப்பட்டார். 2023ம் ஆண்டின் தேசிய பாதுகாப்புச் சட்டத்தின் பிரிவு ஒன்று மற்றும் பிரிவு மூன்றின் கீழ் அந்த நபர் கைது செய்யப்பட்டதாக லண்டன் பயங்கரவாத எதிர்ப்பு காவல்துறை தெரிவித்துள்ளது.

சட்டத்தின் பிரிவு ஒன்று, பாதுகாக்கப்பட்ட தகவல்களைப் பெறுவது அல்லது வெளியிடுவது தொடர்பானது, அதேசமயம் பிரிவு மூன்று ஒரு வெளிநாட்டு உளவுத்துறைக்கு உதவுவது தொடர்பானது.

விசாரணையின் ஒரு பகுதியாக, குளோசெஸ்டர்ஷையரில் உள்ள இரண்டு இடங்களில் அதிகாரிகள் சோதனைகளை நடத்தி வருகின்றனர்.

குளோசெஸ்டர்ஷையரில் உள்ள இன்ஸ்வொர்த்தில் உள்ள இம்ஜின் படைத்தளத்தில் அந்த வீரர் பணியாற்றி வந்ததாக பிபிசி அறிகிறது.

அந்தப் படைத்தளம், நேட்டோவின் கூட்டு விரைவு எதிர்வினைப் படையின் (ARRC) தலைமையகமாகச் செயல்படுகிறது, இது கூட்டணியின் ஒரு மூலோபாய செயல்பாட்டுத் தளமாகும்.

இது வேறு எந்த விசாரணைகளுடனும் தொடர்புடையது அல்ல என்று பயங்கரவாத எதிர்ப்பு காவல்துறை தெரிவித்துள்ளது.