இலங்கைக் கடற்பரப்பில் 19 ஈரானியக் கப்பல்கள்: உதவி குறித்து அரசாங்கம் இன்னும் முடிவெடுக்கவில்லை!

இலங்கையின் கடற்பரப்பிற்கு அப்பால், சர்வதேசக் கடற்பரப்பில் நங்கூரமிட்டுள்ள 19 ஈரானிய எண்ணெய் விநியோகக் கப்பல்களுக்கு உணவு, குடிநீர் மற்றும் எரிபொருள் வழங்குவது தொடர்பில் அரசாங்கம் இதுவரை இறுதித் தீர்மானம் எடுக்கவில்லை என வெளிவிவகார அமைச்சு தெரிவித்துள்ளது. எந்தவொரு உதவியையும் வழங்குவதற்கு முன்னர், இலங்கையின் தேசிய நலன்களுக்கு முன்னுரிமை அளிக்கப்படும் என வெளிவிவகார அமைச்சின் பேச்சாளர் ஒருவர் குறிப்பிட்டுள்ளார்.

அத்துடன், குறித்த கப்பல்களுக்குச் சேவைகளை வழங்கும் உள்நாட்டு நிறுவனங்கள் அமெரிக்காவின் இரண்டாம் நிலைப் பொருளாதாரத் தடைகளுக்கு உள்ளாகக்கூடும் என்றும் அவர் எச்சரித்துள்ளார்.

ஈரானியக் கப்பல்களுக்கு உணவு மற்றும் குடிநீர் வழங்குவதைத் தவிர்க்குமாறு இலங்கை கப்பல் நிறுவனங்களுக்கு அமெரிக்க அதிகாரிகள் அழுத்தம் கொடுத்துள்ளதாக வோல் ஸ்ட்ரீட் ஜேர்னல் செய்தி வெளியிட்டிருந்தது. 

எனினும், அமெரிக்காவிடமிருந்து நேரடியான தடையச்சுறுத்தல்கள் எதுவும் விடுக்கப்படவில்லை என இலங்கை வெளிவிவகார அமைச்சு தெளிவுபடுத்தியுள்ளது.

இலங்கையின் பிரத்யேக பொருளாதார மண்டலத்திற்குள், அதாவது 12 கடல்மைல் எல்லைக்கு அப்பால், சுமார் 47 வெளிநாட்டுக் கப்பல்கள் நங்கூரமிட்டுள்ளதாகவும், அவற்றில் 19 கப்பல்கள் ஈரானியக் கொடியுடன் பயணிப்பவை என்றும் வெளிவிவகார அமைச்சர் விஜித ஹேரத் தெரிவித்துள்ளார்.

இந்நிலையில், 2025ஆம் ஆண்டு தரவுகளின்படி, இலங்கையின் மொத்த ஏற்றுமதியில் சுமார் 24 சதவீதம் அமெரிக்கச் சந்தையைச் சார்ந்துள்ளது. இதனால், அமெரிக்கப் பொருளாதாரத் தடைகள் விதிக்கப்பட்டால் இலங்கையின் வர்த்தகமும் பொருளாதாரமும் பாதிக்கப்படக்கூடும் எனப் பொருளாதார வல்லுநர்கள் எச்சரிக்கின்றனர்.

அதேவேளை, ஐக்கிய நாடுகள் சபையின் கடல்சார் சட்ட உடன்படிக்கையின் 98ஆவது பிரிவின்படி, கடலில் ஆபத்தில் சிக்கியவர்களுக்கு உதவ வேண்டிய பொறுப்பு நாடுகளுக்கு உள்ளது.

குறித்த கப்பல்கள் போர்க்கப்பல்கள் அல்ல, சரக்குக் கப்பல்கள் என்பதால், அவற்றில் உள்ள மாலுமிகளுக்கு உதவுவது மனிதாபிமான அடிப்படையில் அவசியமானது என ஐக்கிய நாடுகள் சபைக்கான இலங்கையின் முன்னாள் பிரதிநிதி தயான் ஜயதிலக்க சுட்டிக்காட்டியுள்ளார்.

இதனால், ஈரானியக் கப்பல்களுக்கு உதவினால் அமெரிக்கப் பொருளாதாரத் தடைகளை எதிர்கொள்ள வேண்டிய அபாயமும், உதவ மறுத்தால் கடலில் உள்ள மாலுமிகளின் உயிருக்கு ஆபத்து ஏற்படக்கூடிய சூழலும் உருவாகியுள்ளது. இந்த நிலைமை இலங்கையின் வெளியுறவுக் கொள்கைக்கும், சுயாதீனமாகத் தீர்மானங்களை மேற்கொள்ளும் உரிமைக்கும் சவாலாக அமைந்துள்ளதாகக் கருதப்படுகிறது.