இராமாயணம் பாணியில் நடந்த சம்பவம் - மனைவியை தீக்குளிக்க கூறிய கணவன் கைது!

மனைவியின் உடலில் மண்ணெண்ணெய் ஊற்றி, 'தன்னை நிரபராதி என்று நிரூபிக்க' சொல்லி தீக்குளிக்க வற்புறுத்திய கணவரை பொலிஸார் கைது செய்துள்ளனர். 

கொக்கட்டிச்சோலை காவல்துறையினர் இது தொடர்பில் விசாரணைகளை முன்னெடுத்துள்ளனர். இதற்கமைய இந்த சம்பவம் நேற்று (17) காலை மட்டக்களப்பு முனைக்காடு பகுதியில் இடம்பெற்றதாக தெரியவந்துள்ளது. 

கைது செய்யப்பட்ட நபர், முனைக்காடு நாகதம்பிரான் கோவில் வீதியைச் சேர்ந்த 36 வயதுடைய கூலித் தொழிலாளி அனுஷ்வரன் என அடையாளம் காணப்பட்டுள்ளார்.  அவர் அதே பகுதியில் வசிக்கும் 31 வயதுடைய பெண்ணை திருமணம் செய்துள்ளார். 

இந்நிலையில் நேற்று காலை 8.30 மணியளவில் பண விவகாரத்தில் அவர்கள் இருவருக்குள்ளும் முரண்பாடு ஏற்பட்டுள்ளது. பின்னர், கணவர் தனது மனைவியின் நடத்தையில் சந்தேகப்பட்டு, "நீ நிரபராதி என்று நிரூபிக்க" தீக்குளிக்க வேண்டும் என வற்புறுத்தியுள்ளார். 

இதனையடுத்து தனக்கு தானே தீவைத்துக் கொண்ட மனைவி தற்போது மட்டக்களப்பு வைத்தியசாலையில் அனுமதிக்கப்பட்டுள்ளார். 

இதற்கிடையே மனைவி தீக்குளித்ததை பார்த்த கணவர்  கூர்மையான ஆயுதத்தால் தன்னைத்தானே காயப்படுத்திக் கொண்டதாகத் தெரிவிக்கப்படுகிறது.

இருப்பினும், குறித்த சந்தேக நபர் தனது மனைவியைக் கொலை செய்ய முயன்று தனக்குத்தானே காயங்களை ஏற்படுத்திக் கொண்ட குற்றச்சாட்டின் பேரில் கொக்கட்டிச்சோலை பொலிஸாரால் கைது செய்யப்பட்டு, இன்று (18) நீதிமன்றத்தில் ஆஜர்படுத்தப்பட உள்ளார்.

    இப்படியான செய்திகளை அறிய தொடர்ந்தும் LANKA4 ஊடகத்துடன் இணைந்திருங்கள்