இலங்கையின் தற்போதைய பொருளாதார நிலைமையும் மக்களின் வாழ்க்கை முறையும்!

இலங்கையில் நிலவும் பொருளாதார நெருக்கடி காரணமாக 60 சதவீதத்திற்கும் அதிகமான குடும்பங்களின் மாத வருமானம் குறைந்துள்ளதாக மக்கள் தொகை கணக்கெடுப்பு மற்றும் புள்ளிவிபர திணைக்களம் தெரிவித்துள்ளது.  

பொருளாதார நெருக்கடியின் தாக்கம் தொடர்பாக நாடளாவிய ரீதியில் அண்மையில் மேற்கொள்ளப்பட்ட குடும்ப கணக்கெடுப்பில் இது தெரியவந்துள்ளதாக திணைக்களம் சுட்டிக்காட்டியுள்ளது. 

கணக்கெடுப்பின்படி இலங்கையில் குடும்பங்களின் மாத வருமானம் 60.5 வீதத்தால் குறைந்துள்ளதுடன், குடும்பங்களின் மாதாந்த செலவு 91 வீதத்தால் அதிகரித்துள்ளதாக தெரியவந்துள்ளது.

தற்போது 3.4 வீதமான குடும்பங்களின் வருமானம் மட்டுமே அதிகரித்துள்ள நிலையில், 36.6 வீதமான குடும்பங்களின் வருமானம் மாறாமல் இருப்பதாக தெரிவிக்கப்பட்டுள்ளது. வருமானம் குறைந்துள்ள குடும்பங்களில் 73.6 வீதமானவர்கள் அதற்கான எந்த நடவடிக்கையும் எடுக்கவில்லை எனவும், 6 வீதமானவர்கள் கூடுதல் வருமானம் அல்லது கூடுதல் வேலை வாய்ப்பைப் பெற்றுள்ளதாகவும் மக்கள் தொகைக் கணக்கெடுப்பு மற்றும் புள்ளிவிபரத் திணைக்களம் தெரிவித்துள்ளது. 

வருமானம் குறைந்த குடும்பங்கள் மேற்கொண்ட நடவடிக்கைகளில், கடன் வாங்குதல், பொருட்களை அடமானம் வைப்பது, பிறரிடம் உணவு மற்றும் பணம் கேட்பது போன்ற உண்மைகள் கணக்கெடுப்பில் தெரியவந்துள்ளது.  

நாட்டில் நிலவும் பொருளாதார நெருக்கடியினால் 22 வீதமான குடும்பங்கள் கடனினால் பாதிக்கப்பட்டுள்ளதாகவும் குறிப்பிடப்படுகின்றது. பொருளாதார நெருக்கடி காரணமாக, மார்ச் 2022க்குப் பிறகு, கிட்டத்தட்ட பாதிப் பேர் தங்கள் முக்கிய வேலையில் மாற்றங்களைச் சந்திக்க வேண்டியுள்ளது என்று தெரியவந்துள்ளது.  

குறிப்பாக பணிக்கு வராமல் இருப்பது, குறைக்கப்பட்ட வேலை நேரம், குறைக்கப்பட்ட ஊதியங்கள் அல்லது கொடுப்பனவுகள் மற்றும் வருமான இழப்பு ஆகியவை ஏற்பட்டதாகக் கூறப்படுகிறது. குறிப்பாக பொருளாதார நெருக்கடியால் 14.2 சதவீதம் பேர் வேலை இழந்துள்ளனர், அவர்களில் பெரும்பாலானோர் ஆண்கள் என்பது தெரியவந்துள்ளது. 

பொருளாதார நெருக்கடியால் கல்வியும் தடைபட்டுள்ளது, இது தொடர்பான கணக்கெடுப்பில் 3 முதல் 21 வயதுக்குட்பட்ட 54.9 சதவீதம் பேர் கல்வி பாதிக்கப்பட்டுள்ளதாக தெரியவந்துள்ளது. இந்த தடைகள் காரணமாக, 53.2 சதவீதம் பேர் எழுதுபொருள்களுக்கான செலவினங்களை குறைத்துள்ளனர் அல்லது தவிர்த்துள்ளனர், 

அதே நேரத்தில் 44 சதவீதம் பேர் புதிய சீருடைகளுக்கான செலவைக் குறைத்துள்ளனர். 2023 ஆம் ஆண்டு மார்ச் மாதத்திற்குப் பின்னர் இலங்கையில் 29 வீதமான மக்கள் நோய்களால் பாதிக்கப்பட்டுள்ளதாகவும், அவர்களில் 7 வீதமானவர்கள் தற்போது நிலவும் பொருளாதார நெருக்கடி காரணமாக சிகிச்சை முறைகளை மாற்றியுள்ளதாகவும் தெரிவிக்கப்படுகிறது. 

சிகிச்சை முறைகளை மாற்றிய நோயாளிகளில் 35.1 சதவீதம் பேர் சிகிச்சை அளிக்கும் இடங்களை மாற்றியுள்ளனர் என்றும், 33.9 சதவீதம் பேர் தங்கள் நோய் தீவிரமடைந்தால் மட்டுமே மருந்துகளை பயன்படுத்துவதாகவும் தெரியவந்துள்ளது.  

சிகிச்சையை மாற்றிய நோயாளிகளில் 81.7 சதவீதம் பேர் போதிய நிதி இல்லாததே மாற்றத்திற்கான முதன்மைக் காரணம் எனக் கூறியுள்ளனர். ஈஸ்டர் ஞாயிறு 2019 தாக்குதலுடன், நாட்டின் பொருளாதாரம் பாதிக்கப்பட்டது, மேலும் கோவிட் தொற்றுநோய்க்குப் பிறகு நெருக்கடி மிகவும் கடுமையானது மற்றும் நெருக்கடியை எதிர்கொள்ள மக்கள் பல சவால்களை எதிர்கொள்கின்றனர் என்று மக்கள் தொகை கணக்கெடுப்பு மற்றும் புள்ளிவிபரத் திணைக்களம் தனது அறிக்கையில் மேலும் சுட்டிக்காட்டியுள்ளது.