தமிழ் மக்கள் நிம்மதியாக வாழ அதிகார பரவலாக்கம் கூட்டு ஒற்றுமையின் அடிப்படையில் ஏற்படுத்தப்பட வேண்டும்!

தமிழர்களை இந்தியா ஒருபோதும் கைவிடாது என்ற கடுமையான நிலைப்பாடுகள் வெளியிடப்பட்டுள்ளதாக தமிழ் மக்கள் கூட்டமைப்பின் பொதுச் செயலாளரும் யாழ்.மாவட்ட நாடாளுமன்ற உறுப்பினருமான சி.வி.விக்னேஸ்வரன் தெரிவித்தார்.

இந்திய மத்திய அரசின் அதிகாரிகள், புத்திஜீவிகள் உட்பட டெல்லியில் நடைபெற்ற பல்வேறு சந்திப்புகளின் போது இந்தியா மேற்படி நிலைப்பாடு வெளியிடப்பட்டுள்ளதாக அவர் குறிப்பிட்டுள்ளார். 

இது குறித்து மேலும் கருத்து வெளியிட்ட அவர், எமது மக்கள் நிம்மதியான வாழ்க்கை வாழ வேண்டுமாயின் இனப்பிரச்சினைக்கான நிரந்தர தீர்வு ஒன்று கூட்டு ஒற்றுமையின் அடிப்படையில் ஏற்படுத்தப்பட வேண்டும் என வலியுறுத்தினோம் என்றும்,  ஒற்றையாட்சி அரசாங்கத்திற்குள் 13ஆவது திருத்தச் சட்டத்தை அமுல்படுத்துவதன் மூலம் அதிகாரப் பரவலாக்கம் நடைபெறுவதாகக் காட்டப்பட்டாலும், அதே அதிகாரப் பகிர்வையே தமிழ் மக்கள் எதிர்பார்க்கின்றனர் எனவும் சிவி.விக்னேஸ்வரன் மேலும் கூறினார். 

மேலும், இரு நாடுகளுக்கும் இடையிலான சர்வதேச உடன்படிக்கையான இந்தியா-இலங்கை ஒப்பந்தம் இன்னும் முழுமையாக அமுல்படுத்தப்படவில்லை எனவும், அதில் இலங்கை அரசாங்கம் மெத்தனமாக செயற்பட்டு வருவதாகவும் நான் வெளிப்படுத்தினேன். அதுமட்டுமின்றி, பொது வாக்கெடுப்பு நடத்தப்பட வேண்டியதன் அவசியத்தை நான் குறிப்பிட்டதுடன், சிங்கள பெரும்பான்மை, பௌத்தம் போன்றவற்றின் பெயரால் நடக்கும் ஆக்கிரமிப்புகளையும் சுட்டிக்காட்டினேன் என்றும் அவர் தெரிவித்துள்ளார். 

அதே சமயம் மத்திய அரசு அதிகாரிகள் மற்றும் அறிவுஜீவிகளுடன் நடத்திய சந்திப்பு மிகவும் முக்கியத்துவம் வாய்ந்தது. எனினும் அவர்களின் பெயர்களை வெளியிட விரும்பவில்லை. எனினும், இந்தியப் பிரதமர் நரேந்திர மோடி உள்ளிட்ட முக்கிய தலைவர்களுக்குச் சொல்ல வேண்டும் என்ற செய்தியைப் பகிர்ந்துள்ளேன் என்றும் அவர் மேலும் தெரிவித்துள்ளமை குறிப்பிடத்தக்கது.