சம்பள வருமான வரி(PAYE) தொடர்பாக வரிச்சலுகைகள் வழங்க திட்டமிட்டுள்ள அரசாங்கம்
ஜனாதிபதி அனுரகுமார திஸாநாயக்க, எதிர்வரும் 2027ஆம் ஆண்டு வரவு செலவுத் திட்டத்தில் சம்பள வருமான வரி(PAYE) தொடர்பாக மேலும் வரிச்சலுகைகள் வழங்க அரசாங்கம் திட்டமிட்டுள்ளதாக அறிவித்துள்ளார்.
கொழும்பில் நடைபெற்ற தேசிய தொழிற்சங்க மாநாட்டில் உரையாற்றிய ஜனாதிபதி, அரசாங்கம் ஏற்கனவே மாதாந்த வரி விலக்கு வருமான வரம்பை ரூ. 100,000 இலிருந்து ரூ. 150,000 ஆக அதிகரித்துள்ளதாகக் குறிப்பிட்டார்.
ஊழியர்களின் வரிச்சுமையைக் குறைக்கும் நோக்கில், எதிர்வரும் வரவு செலவுத் திட்டத்தின் ஊடாக மேலும் வரிச்சலுகைகள் வழங்கப்படும் என்றும் அவர் தெரிவித்தார்.
உழைக்கும் மக்களின் நிதிச் சுமையைக் குறைப்பதற்கான அரசாங்கத்தின் முயற்சிகளில், PAYE வரி கட்டமைப்பில் மேற்கொள்ளப்பட்ட முந்தைய திருத்தமும் ஒன்றாகும் என ஜனாதிபதி சுட்டிக்காட்டினார்.
சர்வதேச நாணய நிதியத்துடன் (IMF) நடத்தப்பட்ட கலந்துரையாடல்களைத் தொடர்ந்து, 2025 ஏப்ரல் மாதம் முதல் மாதாந்த வரி விலக்கு வருமான வரம்பு ரூ. 150,000 ஆக அதிகரிக்கப்பட்டது.
எனினும், புதிய வரி விலக்கு வரம்பு எவ்வளவு இருக்கும் அல்லது மேலதிக வரிச்சலுகைகள் எந்த அளவில் வழங்கப்படும் என்பது தொடர்பில் ஜனாதிபதி இதுவரை குறிப்பிடவில்லை.
2027ஆம் ஆண்டுக்கான வரவு செலவுத் திட்டம் நவம்பர் 12ம் திகதி சமர்ப்பிக்கப்படவுள்ள நிலையில், இந்த அறிவிப்பு வெளியாகியுள்ளது.
அதிக வருமான வரி கழிவுகளால் பாதிக்கப்பட்டுள்ள தொழில் வல்லுநர்கள் உள்ளிட்டோருக்கு மேலும் PAYE வரிச்சலுகைகள் வழங்குவது குறித்து பரிசீலித்து வருவதாக அரசாங்கம் ஏற்கனவே தெரிவித்திருந்தது.
