இலங்கையில் துப்பாக்கிச் சூட்டுச் சம்பவங்கள் குறைவு – அமைச்சர் ஆனந்த விஜேபால தெரிவிப்பு!

இலங்கையில் ஒழுங்கமைக்கப்பட்ட குற்றக் குழுக்களுடன் தொடர்புடைய துப்பாக்கிச் சூட்டுச் சம்பவங்களின் எண்ணிக்கை, 2025ஆம் ஆண்டுடன் ஒப்பிடுகையில் 2026ஆம் ஆண்டில் குறைவடைந்துள்ளதாகப் பொதுமக்கள் பாதுகாப்பு அமைச்சர் ஆனந்த விஜேபால தெரிவித்துள்ளார்.

இன்று (23) நாடாளுமன்றத்தில் உரையாற்றிய அவர், 2020ஆம் ஆண்டு முதல் 2026ஆம் ஆண்டு வரையான காலப்பகுதியில் ஒழுங்கமைக்கப்பட்ட குற்றங்களுடன் தொடர்புடைய 134 துப்பாக்கிச் சூட்டுச் சம்பவங்கள் பதிவாகியுள்ளதாகக் குறிப்பிட்டார்.

இதன்படி, 2020ஆம் ஆண்டில் 2 துப்பாக்கிச் சூட்டுச் சம்பவங்களும், 2021ஆம் ஆண்டில் 4 சம்பவங்களும், 2022ஆம் ஆண்டில் 23 சம்பவங்களும் பதிவாகியுள்ளன. 

2023ஆம் ஆண்டில் 16 சம்பவங்களும், 2024ஆம் ஆண்டில் 42 சம்பவங்களும், 2025ஆம் ஆண்டில் 29 சம்பவங்களும் பதிவாகியுள்ளதாக அமைச்சர் தெரிவித்தார்.

அதேவேளை, 2026ஆம் ஆண்டில் இதுவரையான காலப்பகுதியில் 18 துப்பாக்கிச் சூட்டுச் சம்பவங்கள் பதிவாகியுள்ளதாகவும் அவர் சுட்டிக்காட்டினார்.

ஒழுங்கமைக்கப்பட்ட குற்றக் குழுக்கள் மற்றும் போதைப்பொருள் கடத்தல் வலைப்பின்னல்களைக் கட்டுப்படுத்துவதற்காக முன்னெடுக்கப்பட்ட தீவிர நடவடிக்கைகள் காரணமாக, இவ்வாறான குற்றச் செயல்களைக் கட்டுப்பாட்டுக்குள் கொண்டுவர முடிந்துள்ளதாக அமைச்சர் தெரிவித்தார்.

இதேவேளை, போதைப்பொருள் கடத்தல்காரர்கள் உள்ளிட்ட 236 இலங்கையர்களுக்கு எதிராக சர்வதேச பொலிஸாரின் சிவப்பு எச்சரிக்கைகள் விடுக்கப்பட்டுள்ளதாகவும் அமைச்சர் குறிப்பிட்டார். 

அவர்களில் 94 பேர் ஒழுங்கமைக்கப்பட்ட குற்றச் செயல்களுடன் தொடர்புடையவர்களாகவும் போதைப்பொருள் கடத்தல்காரர்களாகவும் அடையாளம் காணப்பட்டுள்ளதாகவும் அவர் தெரிவித்தார்.

மேலும், போதைப்பொருள் கடத்தல் மற்றும் பாதாள உலகக் குற்றச் செயல்களைக் கட்டுப்படுத்தும் நோக்கில் நாடளாவிய ரீதியில் 17 விசேட பொலிஸ் குழுக்கள் களமிறக்கப்பட்டுள்ளதாகவும் அமைச்சர் தெரிவித்தார்.

உள்நாட்டில் குற்றச் செயல்களைக் கட்டுப்படுத்துவதுடன், வெளிநாடுகளில் இருந்து செயற்படும் போதைப்பொருள் கடத்தல்காரர்களை இலங்கைக்கு அழைத்து வந்து சட்டத்தின் முன் நிறுத்துவதற்கான நடவடிக்கைகளும் முன்னெடுக்கப்பட்டு வருவதாக அவர் மேலும் குறிப்பிட்டார்.

ஒழுங்கமைக்கப்பட்ட குற்றக் குழுக்களின் செயற்பாடுகளைக் கட்டுப்படுத்துதல், போதைப்பொருள் கடத்தல் வலைப்பின்னல்களை முறியடித்தல் மற்றும் சர்வதேச ரீதியில் தேடப்படும் குற்றவாளிகளைக் கைது செய்தல் ஆகிய நடவடிக்கைகள் தொடர்ந்து முன்னெடுக்கப்பட்டு வருவதாகவும் பொதுமக்கள் பாதுகாப்பு அமைச்சர் ஆனந்த விஜேபால தெரிவித்தார்.