டெல்லி சென்ற நடிகர் தனுஷ்! புதிய அரசியல் கட்சி குறித்த தகவல்களால் பரபரப்பு

நடிகர் தனுஷ் புதிய அரசியல் கட்சியைத் தொடங்கத் தயாராகி வருவதாக வெளியாகும் தகவல்கள் தமிழக அரசியல் வட்டாரத்தில் பரபரப்பை ஏற்படுத்தியுள்ளன. ரசிகர் மன்றத்தின் மறுசீரமைப்பு, புதிய கொடி அறிமுகம் மற்றும் அவரது டெல்லிப் பயணம் ஆகியவை இந்த எதிர்பார்ப்பை மேலும் அதிகரித்துள்ளன.

சமீபத்தில் கோவையில் நடைபெற்ற ரசிகர் மன்ற நிர்வாகிகள் ஆலோசனைக் கூட்டத்தைத் தொடர்ந்து, தனுஷின் ரசிகர் மன்றம் நற்பணி இயக்கமாக மாற்றப்பட்டதாகத் தகவல்கள் வெளியாகின. 

அத்துடன், இயக்கத்திற்கான புதிய கொடி மற்றும் இலச்சினையும் அறிமுகப்படுத்தப்பட்டதுடன், தொகுதி வாரியாக உறுப்பினர் சேர்க்கைக்கும் அறிவுறுத்தப்பட்டுள்ளதாகக் கூறப்படுகிறது.

இதற்கிடையில், எதிர்வரும் நவம்பர் 25ஆம் திகதி நற்பணி இயக்கத்தின் பெண் நிர்வாகிகளைத் தனுஷ் சந்திக்கவுள்ளதாகவும் செய்திகள் வெளியாகியுள்ளன.

இந்நிலையில், தனுஷ் டெல்லிக்குப் பயணம் மேற்கொண்டுள்ளதாகவும், அங்கு அரசியல் கட்சியைப் பதிவு செய்வது தொடர்பாகத் தேர்தல் ஆணையத்தை அணுகுவதுடன், முக்கிய அரசியல் தலைவர்களைச் சந்தித்து ஆலோசனை நடத்தத் திட்டமிட்டுள்ளதாகவும் தகவல்கள் தெரிவிக்கின்றன.

மேலும், ‘தமிழக எழுச்சிக் கழகம்’ என்ற பெயரில் புதிய அரசியல் கட்சியைப் பதிவு செய்ய அவர் நடவடிக்கை எடுக்கவுள்ளதாகவும் செய்திகள் வெளியாகியுள்ளன.

எனினும், கட்சி ஆரம்பிப்பது அல்லது பதிவு செய்வது தொடர்பில் தனுஷ் தரப்பிலிருந்து அதிகாரப்பூர்வ அறிவிப்பு வெளியாகியுள்ளதா என்பது உறுதிப்படுத்தப்பட வேண்டியுள்ளது. 

ஏற்கனவே நடிகர் விஜய்யின் அரசியல் வருகையைத் தொடர்ந்து தமிழக அரசியலில் திரையுலகப் பிரபலங்களின் அரசியல் பிரவேசம் குறித்த விவாதங்கள் அதிகரித்துள்ள நிலையில், தனுஷ் தொடர்பாக வெளியாகும் இந்தத் தகவல்கள் அரசியல் வட்டாரத்தில் கவனத்தை ஈர்த்துள்ளன.