பிரித்தானியாவில் அமலுக்கு வந்த புதிய விசா விதிகள்

பிரித்தானியாவில் வெளிநாட்டுப் பணியாளர்கள், குடும்ப விசா வைத்திருப்பவர்கள் மற்றும் ஐரோப்பிய ஒன்றியக் குடியுரிமைத் திட்டத்தின் (EUSS) கீழ் விண்ணப்பிப்போருக்கான புதிய குடிவரவு விதிகள் (Immigration Rules) ஒக்டோபர் 8 ம் திகதி முதல் அதிகாரப்பூர்வமாக அமலுக்கு வந்துள்ளன.

கடந்த செப்டம்பர் 3ம் திகதி உள்துறை அமைச்சகத்தால் (Home Office) வெளியிடப்பட்ட HC 584 கட்டளையின் அடிப்படையிலேயே இந்த புதிய விசா திருத்தங்கள் தற்போது நடைமுறைப்படுத்தப்பட்டுள்ளன.

இருப்பினும், வெளிநாட்டவர்கள் நிரந்தரக் குடியுரிமை (ILR) பெறுவதற்கு 10 ஆண்டுகள் காத்திருக்க வேண்டும் என்ற சர்ச்சைக்குரிய திட்டம் இப் புதிய விதிகளில் சேர்க்கப்படவில்லை என்பது குறிப்பிடத்தக்கது.

பிரித்தானிய விசா நடைமுறைகளில் செய்யப்பட்டுள்ள முதன்மையான 5 திருத்தங்கள்:

திறன்மிகு பணியாளர்கள் (Skilled Workers) பாதுகாப்பு: 

• வேலைத் தளங்களில் நவீன அடிமைத்தனம் அல்லது சுரண்டல்களுக்குள்ளாகி அதிகாரப்பூர்வமாக அடையாளம் காணப்படும் திறன்மிகு பணியாளர்கள், தங்களின் தற்போதைய முதலாளியைச் சார்ந்திராமல் வேறு எந்தவொரு வேலைக்கோ அல்லது சுயதொழிலுக்கோ (Self-employment) மாறும் சுதந்திரம் வழங்கப்பட்டுள்ளது.

EUSS திட்டத்தில் நெகிழ்வுத்தன்மை:

• ஐரோப்பிய ஒன்றியக் குடியுரிமைத் திட்டத்தின் (EU Settlement Scheme) கீழ் தகுதியுடைய நபர்கள், புதிய விண்ணப்பங்களைச் சமர்ப்பிக்காமலேயே தங்களின் தற்காலிகக் குடியுரிமையை (Pre-settled status) நீடிப்பதற்கும், நிரந்தரக் குடியுரிமை (Settled status) பெறுவதற்கும் உள்துறை அமைச்சகத்திற்குச் சிறப்பு அதிகாரங்கள் வழங்கப்பட்டுள்ளன.

நீண்டகால வசிப்பிட விண்ணப்பங்கள் (Long Residence): 

• 10 ஆண்டுகள் நீண்டகால வசிப்பிட அடிப்படையில் நிரந்தரக் குடியுரிமைக்கு விண்ணப்பித்து அது நிராகரிக்கப்படும் பட்சத்தில், தகுதிக்கேற்ப அவர்களின் விண்ணப்பங்கள் குடும்ப அல்லது தனிப்பட்ட வாழ்க்கை உரிமைகளின் கீழ் (Family or Private life) தானாகவே மாற்றப்பட்டுப் பரிசீலிக்கப்படும்.

ஹொங் கொங் BN(O) சிறுவர்களுக்கான தளர்வு:

• ஹொங் கொங் பிஎன்ஓ (Hong Kong BN(O)) விசாவில் உள்ள 18 வயதிற்குட்பட்ட பிள்ளைகள், நிரந்தரக் குடியுரிமை பெற 5 ஆண்டுகள் பூர்த்தி செய்ய வேண்டும் என்ற கட்டாயம் தளர்த்தப்பட்டு, பெற்றோருடன் ஒரே நேரத்தில் குடியுரிமை பெற வழிவகை செய்யப்பட்டுள்ளது.

வருகையாளர் (Visitor) விசா தெளிவுபடுத்தல்கள்: 

• வணிக நோக்கில் வரும் வருகையாளர்கள் பயிலரங்குகள், விவாதங்கள் மற்றும் திறமைப் போட்டிகளில் பங்கேற்க அனுமதி விரிவுபடுத்தப்பட்டுள்ளது. எனினும், சாதாரண வருகையாளர் விசாவில் வேலை செய்ய அனுமதி இல்லை.

10 ஆண்டுகள் காத்திருக்கும் வெளிநாட்டவர்கள் நிரந்தரக் குடியுரிமை(ILR) விதி அமலுக்கு வந்ததா? விளக்கம்!

இப் புதிய விதிகளால் பிரித்தானியாவில் வசிக்கும் ஆயிரக்கணக்கான வெளிநாட்டவர்களுக்குப் பல்வேறு சந்தேகங்கள் எழுந்துள்ளன.

ஆண்டுகள் ILR திட்டம் வரவில்லை: 

• பிரித்தானியாவில் நிரந்தரக் குடியுரிமை (ILR) பெறுவதற்கான தகுதிக் காலத்தை 5 ஆண்டிலிருந்து 10 ஆண்டாக உயர்த்த அரசாங்கம் முன்மொழிந்த திட்டம் இந்த ஒக்டோபர் 8 விதிகளில் அமல்படுத்தப்படவில்லை.

பழைய விண்ணப்பங்களின் நிலை:

• ஒக்டோபர் 8 ஆம் திகதிக்கு முன்னர் சமர்ப்பிக்கப்பட்ட விண்ணப்பங்கள், ஒக்டோபர் 7 ஆம் திகதி வரை அமலில் இருந்த பழைய விதிகளின் படியே பரிசீலிக்கப்படும்.

தனிப்பட்ட பரிசீலனை அவசியம்: 

• ஒவ்வொரு விசா பிரிவிற்கும் இடைக்கால நடைமுறைகள் மாறுபடுவதால், விண்ணப்பதாரர்கள் தங்களின் குறிப்பிட்ட விசா பிரிவிற்குரிய வழிகாட்டல்களைச் சரிபார்க்குமாறு கேட்டுக்கொள்ளப்பட்டுள்ளனர்.