அம்பாறையில் ஹெரோயினுடன் சந்தேகநபர் கைது – 2,190 மில்லிகிராம் போதைப்பொருள் மீட்பு

அம்பாறை நவகம்புர – தயாபுர பகுதியில் மேற்கொள்ளப்பட்ட விசேட சோதனை நடவடிக்கையின்போது, ஹெரோயின் போதைப்பொருளுடன் சந்தேகநபர் ஒருவர் கைது செய்யப்பட்டுள்ளார்.

அம்பாறை பொலிஸ் தலைமையகத்தின் ஊழல் ஒழிப்புப் பிரிவு அதிகாரிகளால் முன்னெடுக்கப்பட்ட இந்த நடவடிக்கையில், சந்தேகநபரிடமிருந்து 2,190 மில்லிகிராம் ஹெரோயின் கைப்பற்றப்பட்டுள்ளதாக பொலிஸார் தெரிவித்துள்ளனர்.

முவங்கல மற்றும் கல்மடுவ பகுதிகளில் போதைப்பொருள் விநியோகத்தில் ஈடுபட்டதாக சந்தேகிக்கப்படும் ஒருவரிடம் இருந்து கிடைத்த இரகசிய தகவலின் அடிப்படையில் இந்த சோதனை மேற்கொள்ளப்பட்டதாக தெரிவிக்கப்பட்டுள்ளது.

கைது செய்யப்பட்ட சந்தேகநபர், ஏற்கனவே போதைப்பொருள் தொடர்பான வழக்கில் கைது செய்யப்பட்டு சிறையில் உள்ள ‘டின் மல்லி’ என அழைக்கப்படும் ‘கல்ஹாரா’ என்பவரின் சகோதரர் என பொலிஸ் விசாரணைகளில் தெரியவந்துள்ளதாக கூறப்படுகிறது.

சம்பவம் தொடர்பான மேலதிக விசாரணைகளை அம்பாறை பொலிஸார் முன்னெடுத்து வருகின்றனர்.