நெருக்கடியில் இருந்து மீண்ட இலங்கைப் பொருளாதாரம் – உலக வங்கி அறிவிப்பு
கடுமையான பொருளாதார நெருக்கடியை எதிர்கொண்டிருந்த இலங்கை, தற்போது அதிலிருந்து மீண்டு பொருளாதார மீட்சிப் பாதையில் பயணித்து வருவதாக உலக வங்கி தெரிவித்துள்ளது.
பொருளாதார நெருக்கடியின் தாக்கத்திலிருந்து நாட்டின் பொருளாதாரம் படிப்படியாக மீண்டு வருவதுடன், பொருளாதார நடவடிக்கைகளிலும் முன்னேற்றம் ஏற்பட்டுள்ளதாக உலக வங்கியின் சமீபத்திய மதிப்பீடுகள் சுட்டிக்காட்டுகின்றன.
எனினும், பொருளாதார மீட்சி அனைத்து மக்களுக்கும் சமமாக சென்றடையவில்லை எனவும், வறுமை மற்றும் வாழ்வாதார சவால்கள் தொடர்ந்தும் காணப்படுவதாகவும் உலக வங்கி சுட்டிக்காட்டியுள்ளது.
பொருளாதார வளர்ச்சியை நிலையானதாக மாற்றுவதற்கு முதலீடுகளை அதிகரித்தல், வேலைவாய்ப்புகளை உருவாக்குதல், உற்பத்தித் திறனை மேம்படுத்துதல் மற்றும் தனியார் துறையின் பங்களிப்பை வலுப்படுத்துதல் முக்கியமானதாகும் என தெரிவிக்கப்பட்டுள்ளது.
மேலும், பொருளாதார மீட்சியை நீண்டகாலத்திற்கு நிலைநிறுத்துவதற்கு நிதி ஒழுக்கம் மற்றும் கட்டமைப்பு ரீதியான சீர்திருத்தங்களை தொடர்ந்து முன்னெடுப்பது அவசியம் எனவும் உலக வங்கி வலியுறுத்தியுள்ளது.
இலங்கையின் பொருளாதாரம் நெருக்கடியின் பின்னர் மீட்சியடைந்து வருகின்ற போதிலும், அந்த மீட்சியை நிலையான வளர்ச்சியாக மாற்றுவதற்கான அடுத்தகட்ட நடவடிக்கைகள் முக்கியமானவை எனவும் உலக வங்கியின் மதிப்பீடுகள் தெரிவிக்கின்றன.
