உலக சந்தை விலைக்கு ஏற்ப எரிபொருள் விலையை மாற்ற IMF வலியுறுத்தல்
இலங்கையில் உள்நாட்டு எரிபொருள் விலைகளை சர்வதேச சந்தை விலைகளுக்கு ஏற்ப மாற்றுவதுடன், செலவை ஈடுசெய்யும் எரிசக்தி விலை நிர்ணய முறையை தொடர்ந்து பேணுமாறு சர்வதேச நாணய நிதியம் (IMF) வலியுறுத்தியுள்ளது.
மத்திய கிழக்கில் நீடிக்கும் மோதல், உலகளாவிய வர்த்தக நிச்சயமற்ற தன்மை மற்றும் El Niño உள்ளிட்ட வெளிப்புற காரணிகளால் இலங்கையின் பொருளாதாரத்திற்கு புதிய சவால்கள் ஏற்படக்கூடும் என IMF எச்சரித்துள்ளது.
எரிபொருள் விலைகள் அதிகரித்தால், பொதுமக்கள் அனைவருக்கும் பரந்த அளவிலான அல்லது காலவரையற்ற நிவாரணங்களை வழங்குவதற்கு பதிலாக, பொருளாதார ரீதியாக பாதிக்கப்படக்கூடிய குடும்பங்களுக்கு இலக்குவைக்கப்பட்ட உதவிகளை வழங்க வேண்டும் என IMF தெரிவித்துள்ளது.
அதேவேளை, பணவீக்கம், அரச நிதிநிலை மற்றும் அந்நிய செலாவணி கையிருப்புகள் மீது வெளிப்புற அதிர்வுகள் ஏற்படுத்தக்கூடிய தாக்கங்களை சமாளிக்க தொடர்ச்சியான நிதி ஒழுக்கமும் பொருளாதார சீர்திருத்தங்களும் அவசியம் எனவும் வலியுறுத்தப்பட்டுள்ளது.
இலங்கையின் பொருளாதாரம் தொடர்ந்து வளர்ச்சியடைந்து வருவதாக தெரிவித்துள்ள IMF, 2026ஆம் ஆண்டின் இரண்டாவது காலாண்டில் பொருளாதாரம் 4.2% வளர்ச்சியடைந்துள்ளதாக குறிப்பிட்டுள்ளது.
மேலும், நாட்டின் அந்நிய செலாவணி கையிருப்பை அதிகரிக்கவும் பொருளாதார அதிர்வுகளை சமாளிக்கவும் நெகிழ்வான மாற்று விகிதத்தை தொடர்ந்து பேணுவது முக்கியம் எனவும் IMF தெரிவித்துள்ளது.
IMF திட்டத்தின் ஏழாவது மதிப்பாய்வில் இலங்கை அதிகாரிகளுடன் பணியாளர் மட்ட உடன்பாடு எட்டப்பட்டுள்ள நிலையில், நிறைவேற்று சபையின் ஒப்புதல் கிடைத்தால் இலங்கைக்கு சுமார் 345 மில்லியன் அமெரிக்க டொலர் நிதி கிடைக்க வாய்ப்புள்ளது.
