முகத்தில் ஐஸ் கட்டி தேய்ப்பது நல்லதா?

சமீபகாலமாக, சமூக ஊடகங்கள் மற்றும் அழகு பராமரிப்பு தளங்களில் "ஐஸ் பேசியல்" (Ice Facial) அல்லது முகத்தில் ஐஸ் கட்டியைத் தேய்க்கும் முறை மிகவும் பிரபலமாகி வருகிறது. பலரும் தங்களது தினசரி சரும பராமரிப்பில் இதை ஒரு முக்கியப் பகுதியாக மாற்றி வருகிறார்கள்.

ஆனால், இந்த ஐஸ் பேசியல் உண்மையில் சருமத்திற்கு எந்த அளவுக்கு நன்மை தரும்? இதில் உள்ள பக்கவிளைவுகள் என்ன? 

என்பது குறித்து விரிவாகப் பார்ப்போம்.

உடனடி நன்மைகள்: தற்காலிக புத்துணர்ச்சி

காலையில் எழும்போது முகம் வீக்கமாக இருப்பது அல்லது சோர்வாகக் காணப்படுவது பலருக்கும் இருக்கும் ஒரு பொதுவான பிரச்சனை. இதற்கு ஐஸ் கட்டி ஒரு எளிய தீர்வாக அமைகிறது. 

வீக்கம் குறையும்: 

முகத்தில், குறிப்பாக கண்களுக்குக் கீழே உள்ள வீக்கத்தை (Puffy Eyes) ஐஸ் கட்டி தேய்ப்பதன் மூலம் உடனடியாகக் குறைக்க முடியும். 

இறுக்கமான சருமம்: 

ஐஸ் கட்டியின் குளிர்ச்சி சருமத்தின் இரத்த நாளங்களைச் சுருக்கி, முகம் தற்காலிகமாக இறுக்கமாகவும் இளமையாகவும் தோன்றுவதற்கு உதவுகிறது.

புத்துணர்ச்சி:

சோர்வடைந்த முகத்திற்கு இது ஒரு சிறந்த, உடனடி புத்துணர்ச்சியை (Instant Glow) தருகிறது. 

உண்மையா, வெறும் கட்டுக்கதையா?

ஐஸ் பேசியல் பற்றி பரவலாகப் பேசப்படும் சில கருத்துக்களில் உள்ள உண்மைகள் இதோ:

துளைகள் சுருங்குமா?

ஐஸ் கட்டி தேய்ப்பதால் முகத்தில் உள்ள சருமத் துளைகள் (Pores) நிரந்தரமாகச் சுருங்கிவிடும் என்று பலர் நம்புகிறார்கள்.

ஆனால், இது ஒரு தற்காலிக விளைவு மட்டுமே.

குளிர்ச்சியால் தற்காலிகமாகச் சுருங்கும் துளைகள், சிறிது நேரத்தில் முகம் சாதாரண வெப்பநிலைக்குத் திரும்பியதும் பழைய நிலைக்கு வந்துவிடும். 

சருமம் வெண்மையாகுமா?

முகத்தில் ஐஸ் தேய்ப்பதால் சருமத்தின் நிறம் வெண்மையாக மாறாது. ஆனால், இரத்த ஓட்டம் தற்காலிகமாக அதிகரிப்பதால் முகம் சற்று பிரகாசமாகத் தோன்றும், அவ்வளவுதான். 

நீண்ட நேரம் பயன்படுத்தினால் ஆபத்தா? 

ஐஸ் கட்டியை நேரடியாகவும், நீண்ட நேரமும் சருமத்தில் பயன்படுத்துவது பல்வேறு பாதிப்புகளை ஏற்படுத்தக்கூடும் என்று நிபுணர்கள் எச்சரிக்கின்றனர்.

எச்சரிக்கை:

ஐஸ் கட்டியை நேரடியாக சருமத்தில் நீண்ட நேரம் வைத்தால், அது "ஐஸ் பர்ன்" (Ice Burn) எனப்படும் பனிப்புண்ணை ஏற்படுத்தலாம்.

இது சருமத்தில் கடுமையான எரிச்சல், சிவப்புத் தழும்புகள் அல்லது சருமக் செல்கள் சேதமடைவதற்கு வழிவகுக்கும்.

பாதுகாப்பாகப் பயன்படுத்துவது எப்படி? 

முகத்திற்கு ஐஸ் பேசியல் செய்ய விரும்பினால், கீழே உள்ள எளிய மற்றும் பாதுகாப்பான வழிமுறையைப் பின்பற்றலாம்: 

நேரடியாகப் பயன்படுத்த வேண்டாம்: ஐஸ் கட்டியை நேரடியாக முகத்தில் தேய்ப்பதைத் தவிர்த்து, ஒரு மெல்லிய, சுத்தமான பருத்தித் துணியில் (Cotton Cloth) சுற்றிப் பயன்படுத்தவும். 

நேர அளவு முக்கியம்: முகத்தில் 1 முதல் 2 நிமிடங்களுக்கு மேல் ஐஸ் கட்டியைத் தேய்க்கக் கூடாது. 

மென்மையான மசாஜ்: வட்ட இயக்கத்தில் (Circular Motion) மிகவும் மெதுவாக முகத்தில் மசாஜ் செய்ய வேண்டும். 

அதிக அழுத்தம் கொடுக்கக் கூடாது.