இலங்கையின் வடக்கு மற்றும் கிழக்கு மாகாணங்களில் இந்திய அமைதிப்படை (IPKF) நிலைகொண்டிருந்த காலப்பகுதியில் கொல்லப்பட்ட மற்றும் பலவந்தமாகக் காணாமல் ஆக்கப்பட்ட 10,000க்கும் மேற்பட்ட தமிழர்களின் விபரங்களைக் கொண்ட புதிய இணையவழி தரவுத்தளத்தை (Online Database) சர்வதேச உண்மைக்கும் நீதிக்குமான திட்டம் (ITJP) மற்றும் மனித உரிமை தரவு பகுப்பாய்வுக் குழு (HRDAG) ஆகிய அமைப்புகள் இணைந்து உத்தியோகபூர்வமாக வெளியிட்டுள்ளன.

1987ஆம் ஆண்டு ஒக்டோபர் மாதம் முதல் 1990ஆம் ஆண்டு மார்ச் மாதம் வரையான இந்திய அமைதிப்படையின் இராணுவ நடவடிக்கைக் காலத்தில், பாதிக்கப்பட்ட 10,427 தனித்துவமான நபர்களின் பெயர்கள் மற்றும் விபரங்கள் இந்த முதற்கட்ட தரவுத்தளத்தில் ஆவணப்படுத்தப்பட்டுள்ளன. 

காலவோட்டம் மற்றும் சாட்சிகளைப் பாதுகாப்பதன் அவசியத்தைக் கருத்திற்கொண்டே, இந்த குறிப்பிட்ட காலப்பகுதிக்கு முன்னுரிமை வழங்கி தரவுகள் தற்போது பகிரங்கப்படுத்தப்பட்டுள்ளன.

நிறுவனங்களின் அறிக்கைகள், சமகாலப் பத்திரிகைகள், இணைய ஆவணங்கள், தமிழ், சிங்களம் மற்றும் ஆங்கில மொழிகளில் எழுதப்பட்ட சாட்சியங்கள் உள்ளிட்ட 65க்கும் மேற்பட்ட நம்பகமான ஆவணக் காப்பகங்களைச் சேகரித்து, அவற்றை முறைப்படுத்தி இந்த ஒருங்கிணைந்த தரவுத்தளம் உருவாக்கப்பட்டுள்ளது.

பாதிக்கப்பட்டவர்கள் வெறும் புள்ளிவிபரங்களாகச் சுருங்கிவிடாமல், அவர்களின் பெயர்கள் மற்றும் அடையாளங்களுடன் வரலாற்றில் நிலைத்திருப்பதை உறுதி செய்வதே இதன் நோக்கம் என ITJP தெரிவித்துள்ளது. 1987ஆம் ஆண்டு கைச்சாத்திடப்பட்ட இலங்கை - இந்திய ஒப்பந்தத்தைத் தொடர்ந்து, அமைதிப்படை என்ற பெயரில் வடக்கு, கிழக்கிற்கு வந்த இந்திய இராணுவம், பின்னர் தமிழ் மக்களுக்கு எதிரான இராணுவ நடவடிக்கைகளில் ஈடுபட்டது. 

இக்காலப்பகுதியில் படுகொலைகள் உட்பட பல மனிதப் பேரவலங்கள், சித்திரவதைகள், பாலியல் வன்முறைகள் மற்றும் கடத்தல்கள் அரங்கேறியதாக தமிழ் அமைப்புகள் தொடர்ச்சியாகக் குற்றம் சாட்டி வருகின்றன.

இது 1958ஆம் ஆண்டு முதல் இலங்கையில் தமிழ் மக்களுக்கு எதிராக இழைக்கப்பட்ட அநீதிகளை ஆவணப்படுத்தும் ஒரு நீண்டகால கூட்டு முயற்சியின் ஒரு பகுதி எனவும், பாதிக்கப்பட்ட குடும்பங்களுக்கான சர்வதேச நீதி மற்றும் உண்மை கண்டறியும் செயல்பாடுகளுக்கு இது வலுச்சேர்க்கும் எனவும் மனித உரிமை அமைப்புகள் சுட்டிக்காட்டியுள்ளன.

லங்கா4 (Lanka4)

(வீடியோ இங்கே )