களனி மற்றும் வனவசல ரயில் நிலையங்களுக்கு இடையே பிரதான வழித்தடத்தில் பயணித்த ரயில் ஒன்று தடம் புரண்டு விபத்துக்குள்ளாகியுள்ளதால், பிரதான பாதையிலான ரயில் சேவைகள் கடுமையாக பாதிக்கப்பட்டுள்ளதாக ரயில்வே திணைக்களம் தெரிவித்துள்ளது.

பொல்கஹவெலவிலிருந்து கொழும்பு கோட்டை நோக்கி அதிகளவிலான பயணிகளுடன் பயணித்துக் கொண்டிருந்த ரயிலே இவ்வாறு களனி - வனவசல இடையே இன்று விபத்துக்குள்ளாகியுள்ளது. 

ரயில் தடம் புரண்ட வேளையில், அதன் ஒரு பெட்டி தண்டவாளத்திலேயே தலைகீழாக கவிழ்ந்துள்ளதாக அங்கிருந்து வரும் தகவல்கள் தெரிவிக்கின்றன. இந்த திடீர் விபத்து காரணமாக ரயிலில் பயணித்த பயணி ஒருவர் காயமடைந்துள்ளதாக முதற்கட்ட தகவல்கள் வெளியாகியுள்ளன. 

காயமடைந்தவர் உடனடியாக மீட்கப்பட்டு சிகிச்சைக்காக அருகில் உள்ள மருத்துவமனையில் அனுமதிக்கப்பட்டுள்ளார். தண்டவாளத்தில் ரயில் பெட்டி கவிழ்ந்து கிடப்பதன் காரணமாக, பிரதான வழித்தடத்திலான ரயில் போக்குவரத்து தற்போது முற்றிலும் ஸ்தம்பிதமடைந்துள்ளது.

இதனால் கொழும்பு நோக்கி வரும் மற்றும் கொழும்பிலிருந்து வெளியூர்களுக்குச் செல்லும் ஏனைய ரயில்களும் ஆங்காங்கே நிறுத்தப்பட்டுள்ளதுடன், வார இறுதி நாட்களில் பயணிக்கும் நூற்றுக்கணக்கான பயணிகள் கடும் அசௌகரியங்களை எதிர்கொண்டுள்ளனர்.

தடம் புரண்ட ரயில் பெட்டியை அகற்றி, தண்டவாளத்தைச் சீரமைத்து, ரயில் சேவைகளை வழமைக்குக் கொண்டு வருவதற்கான அவசரப் பணிகளில் ரயில்வே திணைக்களத்தின் தொழில்நுட்பக் குழுவினர் தீவிரமாக ஈடுபட்டுள்ளதாக அதிகாரிகள் தெரிவித்துள்ளனர்.

லங்கா4 (Lanka4)

(வீடியோ இங்கே )

இச்செய்திக்கு பிரதான அனுசரணை

வீடியோ இங்கே