2027 பிரான்ஸ் தேர்தல் களம்: எட்வார்ட் பிலிப்பிற்கு சவால் கொடுக்கும் இளம் தலைவர் - அதிரடி திருப்பம்!

சமீபத்தில் நடந்து முடிந்த நகராட்சித் தேர்தல்களின் இரண்டாம் கட்ட வாக்குப்பதிவு முடிவுகள், 2027-ஆம் ஆண்டு நடைபெறவுள்ள அதிபர் தேர்தலுக்கான முன்னோட்டமாகப் பார்க்கப்படுகிறது. 

இது தொடர்பாக 'எல்.சி.ஐ' ஊடகத்திற்காக எடுக்கப்பட்ட புதிய கருத்துக் கணிப்பில், முன்னாள் பிரதமர் எட்வார்ட் பிலிப் மக்களின் விருப்பத்திற்குரிய முதன்மை வேட்பாளராக உருவெடுத்துள்ளார்.

தற்போது லெ ஹாவ்ர் நகர முதல்வராக இருக்கும் எட்வார்ட் பிலிப், அங்கு சுமார் நாற்பத்தேழு சதவீத வாக்குகளைப் பெற்றுத் தனது செல்வாக்கை நிரூபித்துள்ளார். 

இதன் விளைவாக, கருத்துக் கணிப்பில் பங்கேற்றவர்களில் நாற்பத்தாறு சதவீதத்தினர் இவரை ஒரு "தகுதியான அதிபர் வேட்பாளர்" என்று பாராட்டியுள்ளனர். 

இவர் வரும் ஏப்ரல் மாதம் பன்னிரண்டாம் தேதி பாரிஸில் தனது தேர்தல் பரப்புரையை முறைப்படி தொடங்குவார் என எதிர்பார்க்கப்படுகிறது.

தீவிர வலதுசாரிக் கட்சியின் தலைவரான இளந்தலைவர் ஜோர்டான் பர்டெல்லா, நாற்பத்தைந்து சதவீத ஆதரவுடன் எட்வார்ட் பிலிப்புக்கு மிக நெருக்கமான சவாலை அளித்து வருகிறார். 

வியக்கத்தக்க வகையில், தனது அரசியல் ஆசான் மரின் லு பென்னை (நாற்பத்திரண்டு சதவீத ஆதரவு) விட பர்டெல்லா இப்போது அதிக ஆதரவைப் பெற்றுள்ளார்.

மரின் லு பென் மீதான ஒரு வழக்கு வரும் ஜூலை மாதம் ஏழாம் திகதி தீர்ப்புக்கு வரவுள்ளது. ஒருவேளை நீதிமன்றம் அவருக்குத் தேர்தலில் போட்டியிடத் தடை விதித்தால், ஜோர்டான் பர்டெல்லா தான் அதிபர் தேர்தலில் அந்தக் கட்சியின் அதிகாரப்பூர்வ வேட்பாளராகக் களம் இறங்குவார் என்பது உறுதியாகியுள்ளது.

வலதுசாரி மற்றும் மையவாதத் தலைவர்கள் முன்னணியில் இருக்கும் நிலையில், இடதுசாரிக் கட்சிகள் இந்தப் பட்டியலில் மிகவும் பின் தங்கியுள்ளன. 

ரபேல் கிளக்ஸ்மேன் மற்றும் பிரான்சுவா ரஃபின் போன்ற தலைவர்கள் எட்டாவது இடத்தையே பிடித்துள்ளனர். நீண்டகாலமாக இடதுசாரி அரசியலில் செல்வாக்கு செலுத்திய ஜோன்-லுக் மெலன்சோன் வெறும் பதினாறு சதவீத ஆதரவுடன் பட்டியலின் கடைசி இடத்திற்குத் தள்ளப்பட்டுள்ளார்.

நகராட்சித் தேர்தலுக்குப் பிறகு, 'தேசியப்பேரணி RN ' எனப்படும் தீவிர வலதுசாரிக் கட்சி முன்னெப்போதையும் விட அதிக வலிமையுடன் உருவெடுத்துள்ளதாக ஐம்பத்திரண்டு சதவீத மக்கள் நம்புகின்றனர். 

அதே சமயம், அதிபர் மக்ரோனின் ஆளுங்கட்சி மற்றும் அதன் கூட்டணி கட்சிகள் இந்தத் தேர்தலில் பெரும் பின்னடைவைச் சந்தித்துள்ளன. அதிபர் மாளிகையை நோக்கி இப்போதே காய்கள் நகர்த்தப்படத் தொடங்கிவிட்டன. 

வரும் நாட்களில் பிரான்ஸ் அரசியல் களம் இன்னும் பல அதிரடி மாற்றங்களைக் காணப்போகிறது என்பது மட்டும் நிச்சயம்.

செய்திகளை அறிய தொடர்ந்தும் https://www.lanka4.com/ ஊடகத்துடன் இணைந்திருங்கள்