வேலைக்கு ஆட்களை அமர்த்தும் வீட்டு உரிமையாளர்களுக்கு காவல்துறையின் முக்கிய எச்சரிக்கை!!

நாட்டின் பல்வேறு பகுதிகளில் பதிவாகியுள்ள வீடுகளில் இடம்பெறும் திருட்டுச் சம்பவங்களைக் கருத்திற்கொண்டு, வீட்டுப் பணி உதவியாளர்களை வேலைக்கு அமர்த்தும் போது அதிக விழிப்புடன் இருக்குமாறு காவல்துறை வீட்டு உரிமையாளர்களுக்கு விசேட ஆலோசனைகளை வழங்கியுள்ளது.

அண்மைய முறைப்பாடுகளை ஆராயும்போது, வீட்டுப் பணி உதவியாளர்கள் தங்கம், பணம், வெளிநாட்டு நாணயம் மற்றும் ஏனைய பெறுமதிமிக்க பொருட்களைத் திருடுவதாகத் காவல்துறை ஊடகப் பிரிவு தெரிவித்துள்ளது.

கொழும்பு மற்றும் அதனைச் சுற்றியுள்ள மிரிஹான, மஹரகம, தெஹிவளை, கல்கிஸ்ஸை போன்ற பகுதிகளிலும், நாட்டின் ஏனைய பகுதிகளிலும் வீட்டுப் பணிக்கு ஆட்களை அமர்த்துவது ஒரு பொதுவான நடைமுறையாக உள்ளது.

இவ்வாறான நியமனங்கள் முகவர் நிலையங்கள், தரகர்கள் அல்லது நேரடியாக வீட்டு உரிமையாளர்களூடாக மேற்கொள்ளப்படுகின்றன. இருப்பினும், பணிக்கு அமர்த்தப்பட்டவர்கள் உரிமையாளர்களின் பணம், நகை மற்றும் சொத்துக்களைத் திருடியுள்ளதாக பல முறைப்பாடுகள் காவல்துறை நிலையங்களுக்குக் கிடைத்துள்ளன.

இதனைத் தடுக்கும் நோக்கில் பொதுமக்கள் பின்பற்ற வேண்டிய வழிகாட்டுதல்கள் வருமாறு:

01. சில நபர்கள் திட்டமிட்டு செல்வந்தர்களின் வீடுகளைக் குறிவைத்து, தமது நெருங்கிய குடும்ப உறுப்பினர்களையும் இணைத்துக்கொண்டு இவ்வாறான திருட்டுக்களில் ஈடுபடுகின்றனர்.

02. இவர்கள் குறுகிய காலத்திலேயே வீட்டு உரிமையாளர்கள் மற்றும் குடும்ப உறுப்பினர்களின் நம்பிக்கையை வென்றெடுக்கும் வகையில் நடந்துகொள்கின்றனர்.

03. எவரையும் வேலைக்கு அமர்த்துவதற்கு முன்னர் அவர்களின் பின்னணி குறித்து முழுமையாக ஆராய வேண்டும்.

04. அவர்களின் தேசிய அடையாள அட்டையின் தெளிவான நிழற்படப் பிரதியை (Photocopy) பெற்றுக்கொள்வதோடு, அசல் பிரதியுடன் ஒப்பிட்டு அதனை உறுதிப்படுத்த வேண்டும்.

05. வேலைக்கு அமர்த்தப்படுபவர்களின் நிரந்தர மற்றும் தற்காலிக வதிவிடங்களுக்குரிய காவல்துறை நிலையங்களில் இருந்து பெறப்பட்ட காவல்துறை அறிக்கையைப் (Police Report) பெற்றுக்கொள்வது அவசியமாகும்.

06. அவர்களின் குடும்ப உறுப்பினர்கள் மற்றும் அவசர காலத் தொடர்புகளுக்கான தொலைபேசி எண்களை முன்கூட்டியே பெற்றுக்கொள்ள வேண்டும்.

07. வீட்டில் உள்ள நகைகள், பணம் மற்றும் பெறுமதியான ஆவணங்களைப் பாதுகாப்பான இடங்களில் வைப்பதில் அவதானம் செலுத்த வேண்டும்.

08. முடிந்தவரை வீட்டுப் பணி உதவியாளர்களை வீட்டில் தனியாக விட்டுச் செல்ல வேண்டாம். தேவைப்படின் பெறுமதியான பொருட்களின் பாதுகாப்பை உறுதிப்படுத்த உரிய நடவடிக்கை எடுக்க வேண்டும்.

மேற்குறிப்பிட்ட ஆவணங்களின் பிரதிகளை வீட்டு உரிமையாளர் வசிக்கும் பிரிவுக்குட்பட்ட காவல்துறை நிலையப் பொறுப்பதிகாரியிடம் (OIC) வழங்கித் தெளிவுபடுத்துவதுடன், அந்த ஆவணங்களின் விபரங்களை உரிமையாளர்களும் தன்னிடம் வைத்திருப்பது அவசியமாகும்.

இந்த விடயங்கள் குறித்து பொதுமக்கள் அவதானம் செலுத்துவதன் மூலம் இவ்வாறான மோசடிச் செயல்களைக் குறைக்க முடியும் என காவல்துறை மேலும் வலியுறுத்தியுள்ளது.

செய்திகளை அறிய தொடர்ந்தும் https://www.lanka4.com/ ஊடகத்துடன் இணைந்திருங்கள்