இஸ்ரேல் மற்றும் அமெரிக்காவின் கூட்டுத் தாக்குதல்களைத் தொடர்ந்து, மத்திய கிழக்கில் உயிரிழப்புகளின் எண்ணிக்கை வேகமாக அதிகரித்து வருகிறது. ஈரான் முழுவதும் நடத்தப்பட்ட தாக்குதல்களில் இதுவரை 200-க்கும் மேற்பட்டோர் கொல்லப்பட்டுள்ளதாகவும், 700-க்கும் அதிகமானோர் காயமடைந்துள்ளதாகவும் ரெட் கிரசண்ட் (Red Crescent) அமைப்பு சனிக்கிழமை உறுதிப்படுத்தியுள்ளது.

ஈரானின் மொத்தமுள்ள 31 மாகாணங்களில் 24 மாகாணங்கள் இந்தத் தாக்குதலால் கடுமையாகப் பாதிக்கப்பட்டுள்ளன. குறிப்பாக, தெற்கு ஈரானில் உள்ள ஒரு பாடசாலையில் ஏற்பட்ட சக்திவாய்ந்த வெடிப்பில் குறைந்தது 108 பேர் உயிரிழந்துள்ளதாக உள்ளூர் வழக்கறிஞர் தெரிவித்துள்ளார். இந்தச் சம்பவம் அந்நாட்டில் பெரும் அதிர்ச்சியை ஏற்படுத்தியுள்ளது. ஈரான் நடத்திய பதில் தாக்குதல்களில், இஸ்ரேலின் மத்திய டெல் அவிவ் பகுதியில் உள்ள பல கட்டிடங்கள் ஏவுகணைத் தாக்குதலுக்கு உள்ளாகின. இதில் ஒருவர் உயிரிழந்துள்ளதோடு, 20-க்கும் மேற்பட்டோர் காயமடைந்துள்ளதாக இஸ்ரேலிய செய்தித்தாளான 'ஹாரெட்ஸ்' செய்தி வெளியிட்டுள்ளது.

அதேபோல், அமெரிக்க இராணுவத் தளங்களைக் கொண்டுள்ள பஹ்ரைன், குவைத், கத்தார் மற்றும் ஐக்கிய அரபு அமீரகம் ஆகிய நாடுகள் மீதும் ஈரான் ட்ரோன் மற்றும் ஏவுகணைத் தாக்குதல்களை நடத்தியது. இதில் அபுதாபியில் ஒருவர் கொல்லப்பட்டதாக ஐக்கிய அரபு அமீரக அரசு ஊடகம் தெரிவித்துள்ளது. இந்த போர் குறித்து கருத்து தெரிவித்துள்ள அமெரிக்க அதிபர் டொனால்ட் டிரம்ப், "துணிச்சலான அமெரிக்க வீரர்களின் உயிர்கள் இழக்கப்படலாம்" எனக் குறிப்பிட்டுள்ளார்.

இருப்பினும், இதுவரை அமெரிக்க இராணுவத் தரப்பில் உயிரிழப்புகள் ஏதும் அதிகாரப்பூர்வமாகப் பதிவு செய்யப்படவில்லை. குண்டுவெடிப்புகள் இந்த வாரம் முழுவதும் தொடர வாய்ப்புள்ளதால், இறப்பு எண்ணிக்கை இன்னும் அதிகரிக்கக்கூடும் என்றும் அவர் எச்சரித்துள்ளார்.

லங்கா4 (Lanka4)

(வீடியோ இங்கே )