இலங்கையில் பணமோசடி விடயத்தில் வலுவான கட்டமைப்பு அவசியம் - ஜனாதிபதி வலியுறுத்தல்!

இலங்கையில் பணமோசடி மற்றும் பயங்கரவாதத்திற்கு நிதியுதவி செய்வதை தடுப்பதற்கு வலுவான கட்டமைப்பு தேவை என ஜனாதிபதி அனுரகுமார திஸாநாயக்க தெரிவித்துள்ளார்.

 பணமோசடியை தடுப்பது மற்றும் பயங்கரவாதத்திற்கு நிதியுதவி செய்வதை தடுப்பது தொடர்பாக ஆசிய பசுபிக் குழுவினால் நடத்தப்படவுள்ள இலங்கையின் பரஸ்பர மதிப்பீட்டை  தயாரிப்பதன் முக்கியத்துவம் குறித்து இடம்பெற்ற கலந்துரையாடலின்போதே அவர் இவ்வாறு குறிப்பிடடுள்ளார். 

இந்த கலந்துரையாடலில் அமைச்சர்கள் சபை, அமைச்சின் செயலாளர்கள், இலங்கை மத்திய வங்கி அதிகாரிகள் மற்றும் நிதி புலனாய்வு பிரிவு அதிகாரிகள் கலந்துகொண்டனர். 

அமைச்சகங்கள், ஒழுங்குமுறை முகமைகள் மற்றும் சட்ட அமலாக்க முகவர் உட்பட 24 பங்குதாரர் நிறுவனங்களுக்காக தயாரிக்கப்பட்ட அமைச்சரவையால் அங்கீகரிக்கப்பட்ட செயல் திட்டங்களை செயல்படுத்துவதற்கான அவசரத் தேவையை நிதிப் புலனாய்வுப் பிரிவு வலியுறுத்தியது. 

இந்த செயல் திட்டம் சட்ட சீர்திருத்தங்கள், திறன் மேம்பாடு, மேம்படுத்தப்பட்ட தொடர்பு ஒத்துழைப்பு மற்றும் நிதி நடவடிக்கை பணிக்குழு (FATF) உருவாக்கிய பரிந்துரைகளை செயல்படுத்த விரிவான புள்ளிவிவரங்களை பராமரித்தல் ஆகியவற்றிற்கு முன்னுரிமை அளிக்கிறது.

 இந்தத் திட்டங்களுக்கு முழுமையாக இணங்குவதை உறுதி செய்வதற்கும் அதன் முன்னேற்றத்தை உன்னிப்பாகக் கண்காணிப்பதற்கும் அர்ப்பணிப்புள்ள குழுக்களை நியமிக்குமாறு ஜனாதிபதி அனுரகுமார திஸாநாயக்க நிதிப் புலனாய்வுப் பிரிவு, அமைச்சர்கள், செயலாளர்கள் மற்றும் அதிகாரிகளுக்கு பணிப்புரை விடுத்தார். 

 அத்துடன், இலங்கையின் நிதி அமைப்பின் ஸ்திரத்தன்மையை உறுதிப்படுத்துமாறும், இந்தப் பணிக்கு ஒத்துழைக்குமாறு கேட்டுக் கொண்ட ஜனாதிபதி, நாட்டின் பொருளாதாரம் மற்றும் சர்வதேச நம்பிக்கையைப் பேணுவதற்கு பணச் சலவையைத் தடுப்பதற்கும் பயங்கரவாதத்திற்கு நிதியளிப்பதைத் தடுப்பதற்கும் வலுவான மற்றும் பயனுள்ள கட்டமைப்பொன்று அவசியமானது என்றும் சுட்டிக்காட்டினார்.