தமிழர் அரசியலில் நான்கு தசாப்த காலப் பயணம் - ம.க. சிவாஜிலிங்கத்தின் வாழ்க்கையும் அரசியல் வரலாறும்!

நான்கு தசாப்தங்களுக்கும் மேலாக வடக்கு – கிழக்கு தமிழ் அரசியலில் தனக்கென ஓர் இடத்தைப் பிடித்திருந்த மூத்த அரசியல்வாதி ம.க. சிவாஜிலிங்கம் அவர்கள் தனது 69 ஆவது வயதில் காலமானார்.

அரசியல் மேடைகளிலும், மக்கள் போராட்டங்களிலும், தமிழ் மக்களின் அரசியல் உரிமைகள் தொடர்பான விவாதங்களிலும் தனது தனித்துவமான அணுகுமுறையால் கவனம் பெற்றவர் ம.க. சிவாஜிலிங்கம் அவர்கள்.

மகாலிங்கம் கனகலிங்கம் சிவாஜிலிங்கம் அவர்கள் 1957 ஆம் ஆண்டு ஆகஸ்ட் 15 ஆம் திகதி யாழ்ப்பாணம் வடமராட்சிப் பகுதியிலுள்ள வல்வெட்டித்துறையில் பிறந்தார்.

தமிழ் மக்களின் அரசியல் உரிமைகள் தொடர்பான கோரிக்கைகள் தீவிரமடைந்த காலப்பகுதியில் இளமைக் காலத்தைக் கழித்த அவர், தமிழீழ விடுதலை இயக்கமான TELO அமைப்பின் ஊடாகத் தனது அரசியல் பயணத்தை ஆரம்பித்தார்.

1980 களில் தமிழ் அரசியல் மற்றும் ஆயுத இயக்கங்களுக்கிடையில் ஏற்பட்ட மோதல்கள் பலரது அரசியல் வாழ்க்கையையும் மாற்றியமைத்தன. அவ்வாறான கடினமான காலப்பகுதியில் உயிர் தப்பியவர்களில் சிவாஜிலிங்கமும் ஒருவர்.

பின்னர் TELO அமைப்பின் அரசியல் செயற்பாடுகளில் முக்கிய பங்காற்றியதுடன், அதன் தேசிய அமைப்பாளராகவும் தலைவராகவும் பணியாற்றினார்.

2001ம் ஆண்டு இலங்கைத் தமிழரசுக் கட்சி, TELO உள்ளிட்ட தமிழ் அரசியல் கட்சிகள் ஒன்றிணைந்து தமிழ்த் தேசியக் கூட்டமைப்பு உருவாக்கப்பட்ட காலப்பகுதியில் சிவாஜிலிங்கமும் முக்கிய பங்காற்றினார்.

2001 மற்றும் 2004ம் ஆண்டுகளில் நடைபெற்ற பொதுத்தேர்தல்களில் யாழ்ப்பாண மாவட்டத்தைப் பிரதிநிதித்துவப்படுத்தி நாடாளுமன்றத்திற்குத் தெரிவானார்.

2008ம் ஆண்டு இலங்கையின் இறுதிக்கட்டப் போர் தீவிரமடைந்திருந்த காலத்தில், அவரது அரசியல் நிலைப்பாடுகள் இந்தியாவிலும் சர்ச்சைகளை ஏற்படுத்தின. 

இந்தியாவிலிருந்து வெளியேறுமாறு அவருக்கு உத்தரவிடப்பட்டதைத் தொடர்ந்து சென்னைக்குச் சென்றிருந்தார்.

2010ம் ஆண்டு நடைபெற்ற இலங்கை ஜனாதிபதித் தேர்தலில் சுயேச்சை வேட்பாளராகப் போட்டியிட்டு 9,662 வாக்குகளைப் பெற்றார்.

அவரது தேர்தல் முடிவு தொடர்பாகத் தமிழ் அரசியல் வட்டாரங்களில் பல்வேறு விமர்சனங்களும் கருத்து வேறுபாடுகளும் முன்வைக்கப்பட்டன.

இருப்பினும், தனது அரசியல் நிலைப்பாட்டை வெளிப்படுத்துவதற்காகத் தேர்தல் களத்தையும் பயன்படுத்தியவர் என்ற அடையாளத்தைப் பெற்றார். 

பின்னர், 2013ம் ஆண்டு நடைபெற்ற வடக்கு மாகாண சபைத் தேர்தலில் போட்டியிட்டு உறுப்பினராகத் தெரிவானார். 

2014ம் ஆண்டு ஜெனீவாவில் நடைபெற்ற ஐக்கிய நாடுகள் மனித உரிமைகள் பேரவையிலும் போர்க்கால விவகாரங்கள் தொடர்பான தனது நிலைப்பாட்டை வெளிப்படுத்தினார். 

2009ம் ஆண்டு யுத்தம் முடிவடைந்த பின்னரும் தமிழ் மக்களின் நினைவேந்தல் நிகழ்வுகள், போரில் உயிரிழந்தவர்களை நினைவுகூரும் உரிமை மற்றும் அரசியல் உரிமைகள் தொடர்பான விடயங்களில் சிவாஜிலிங்கம் தொடர்ந்து குரல் கொடுத்து வந்தார். 

2020ம் ஆண்டு தியாகதீபம் திலீபனின் நினைவேந்தல் நிகழ்வை முன்னெடுத்தமை தொடர்பாகப் பொலிஸாரால் கைது செய்யப்பட்டு பின்னர் பிணையில் விடுவிக்கப்பட்டார். இவ்வாறான செயற்பாடுகள் அவருக்கு ஆதரவாளர்களையும் அதேவேளை அரசியல் விமர்சகர்களையும் உருவாக்கின. 

2019ம் ஆண்டு மீண்டும் ஜனாதிபதித் தேர்தலில் சுயேச்சை வேட்பாளராகப் போட்டியிட்டார். அந்தத் தேர்தலில் 12,256 வாக்குகளைப் பெற்றார்.

பின்னர் தமிழ்த் தேசியக் கட்சியின் அரசியல் செயற்பாடுகளில் ஈடுபட்டதுடன், 2025ம் ஆண்டு வல்வெட்டித்துறை நகரசபையின் தவிசாளராகப் பொறுப்பேற்றார்.

நீண்டகாலமாக சிறுநீரக நோயால் பாதிக்கப்பட்டிருந்த அவர், 2026ம் ஆண்டு ஜூன் மாதம் கொழும்பில் சிறுநீரக மாற்று அறுவைச் சிகிச்சைக்கு உட்படுத்தப்பட்டார். 

எனினும், உடல்நிலையில் ஏற்பட்ட தொடர் பாதிப்புகளுக்கு மத்தியில் 2026 நவம்பர் 14ம் திகதி இரவு வல்வெட்டித்துறையில் தனது 69 ஆவது வயதில் காலமானார்.