கைவிடப்பட்ட 2015–2019 கால வீடமைப்புத் திட்டங்களை மீண்டும் ஆரம்பிக்க ஜனாதிபதி அநுர நடவடிக்கை

2015–2019 காலப்பகுதியில் ஆரம்பிக்கப்பட்டு, போதிய நிதி ஒதுக்கீடு மற்றும் முறையான திட்டமிடல் இல்லாத காரணத்தால் இடைநடுவில் கைவிடப்பட்ட வீடமைப்புத் திட்டங்களை மீண்டும் முழுமைப்படுத்துவதற்கு ஜனாதிபதி அனுரகுமார திசாநாயக்க நடவடிக்கை எடுத்துள்ளார்.

குறிப்பாக, கடந்த காலங்களில் சிறிய அளவிலான நிதியுதவிகளுடன் ஆரம்பிக்கப்பட்டு, பாதியிலேயே கட்டுமானப் பணிகள் நிறுத்தப்பட்ட வீடுகளால் பெரும் சிரமங்களை எதிர்கொண்ட ஆயிரக்கணக்கான குடும்பங்களுக்கு இந்த அறிவிப்பு நம்பிக்கையை ஏற்படுத்தியுள்ளது.

பாதியில் நிற்கும் வீடுகளுக்கு மேலதிகமாக ரூ.5 இலட்சம் வரை நிதியுதவி!

ஜனாதிபதி தனது வரவு செலவுத் திட்ட உரையில், பாதியில் நிறுத்தப்பட்ட வீடுகளின் எஞ்சிய நிர்மாணப் பணிகளைப் பூர்த்தி செய்வதற்காக தகுதியான பயனாளிகளுக்கு ரூ.5 இலட்சம் வரையிலான மேலதிக நிதியுதவி வழங்குவதற்கு ரூ.5,000 மில்லியன் ஒதுக்கீடு செய்யப்படுவதாகத் தெரிவித்துள்ளார்.

கடந்த அரசாங்கங்களின் காலத்தில் ஆரம்பிக்கப்பட்டு முடிக்கப்படாமல் கைவிடப்பட்ட வீடமைப்புத் திட்டங்களுக்கு தீர்வு காணும் இந்த நடவடிக்கை, பாதிக்கப்பட்ட குடும்பங்களுக்கு ஒரு புதிய நம்பிக்கையை ஏற்படுத்தியுள்ளது.

அரசியல் மாற்றங்கள் எதுவாக இருந்தாலும், பாதிக்கப்பட்ட மக்களின் வீடமைப்புக் கனவுகள் நனவாக வேண்டும் என்பதே தற்போது மக்களின் எதிர்பார்ப்பாக உள்ளது.

பாதியில் நின்ற வீடுகளுக்கு விடிவு கிடைக்குமா? என்ற மக்களின் கேள்விக்கு ஜனாதிபதியின் இந்த அறிவிப்பு நம்பிக்கையளிக்கும் பதிலாக அமைந்துள்ளது!