உக்ரேனிய சிறுவர் அகதிகளிடம் மன்னிப்பு கோரிய ஐக்கிய இராச்சியம்
இங்கிலாந்து பள்ளிகளில் ரஷ்ய மொழியைக் கற்க அறிவுறுத்தப்பட்ட உக்ரேனிய அகதிச் சிறுவர்களிடம் ஐக்கிய இராச்சியம் (UK) மன்னிப்பு கோரியுள்ளது.
2022ல் விளாடிமிர் புடினின் படையெடுப்பைத் தொடர்ந்து, ஐக்கிய இராச்சியத்தில் தஞ்சம் புக நேர்ந்த உக்ரேனியச் சிறுவர்கள், உக்ரேனிய மொழியில் GCSE தேர்வு இல்லாத சூழலில், ரஷ்ய மொழியைக் கற்குமாறு தங்கள் ஆசிரியர்கள் கூறியது "அவமரியாதையானது" என்று தெரிவித்துள்ளனர்.
இந்த புதிய கல்வித் தகுதியை அறிவித்த பள்ளிக் கல்வித்துறை அமைச்சர் ஜார்ஜியா கோல்ட், "பல மாணவர்கள் ரஷ்ய மொழியைக் கற்க வேண்டிய கட்டாயத்திற்குத் தள்ளப்பட்டனர்.
அவர்கள் அத்தகைய சூழலுக்கு ஆளாக்கப்பட்டதற்காக நான் வருந்துகிறேன். அவர்களுக்கு உக்ரேனிய மொழியில் GCSE தேர்வுக்கான வாய்ப்பு கிடைப்பது மிகவும் முக்கியமானது" என்று குறிப்பிட்டுள்ளார்.
இங்கிலாந்தில் 2028ம் ஆண்டு முதல் நடைமுறைக்கு வரவுள்ள இந்த புதிய கல்வித் தகுதியை, AQA தேர்வு வாரியம் உருவாக்கி வருகிறது. இதற்காக கல்வித் துறையிலிருந்து 3,40,000 பவுண்டுகள் நிதி வழங்கப்பட்டுள்ளது.
ஐக்கிய இராச்சியத்திற்கு வந்துள்ள 30,000க்கும் மேற்பட்ட உக்ரேனியச் சிறுவர்களுக்காக, உக்ரேனிய அரசாங்கமும் அந்நாட்டு சமூகக் குழுக்களும் பல ஆண்டுகளாக விடுத்த கோரிக்கைகளின் விளைவாகவே இந்த நடவடிக்கை எடுக்கப்பட்டுள்ளது.
