கெஹெலிய ரம்புக்வெல்ல உள்ளிட்ட நால்வருக்கு பிணை! வெளிநாடு செல்லவும் நீதிமன்றம் தடை

தரமற்ற மருந்துகள் இறக்குமதி செய்யப்பட்ட விவகாரத்தில், நீதிமன்றம் உத்தரவிட்ட இழப்பீட்டுத் தொகையை முழுமையாகச் செலுத்தத் தவறிய முன்னாள் அமைச்சர் கெஹெலிய ரம்புக்வெல்ல உள்ளிட்ட நான்கு பிரதிவாதிகளையும் பிணையில் விடுவிக்க உயர் நீதிமன்றம் உத்தரவிட்டுள்ளது.

அத்துடன், குறித்த நால்வரும் வெளிநாடு செல்வதற்கும் நீதிமன்றம் தடை விதித்துள்ளது. முந்தைய அரசாங்கத்தின் ஆட்சிக்காலத்தில் தரமற்ற மருந்துகள் இறக்குமதி செய்யப்பட்டதன் மூலம் அடிப்படை மனித உரிமைகள் மீறப்பட்டதாகத் தீர்ப்பளித்த உயர் நீதிமன்றம், இவ்வழக்கில் பெயரிடப்பட்டிருந்த ஐந்து பிரதிவாதிகளுக்கும் கடந்த மார்ச் மாதம் இழப்பீடு செலுத்துமாறு உத்தரவிட்டிருந்தது.

இதன்படி, முன்னாள் அமைச்சர் கெஹெலிய ரம்புக்வெல்ல 75 மில்லியன் ரூபா இழப்பீடு செலுத்த வேண்டியிருந்த நிலையில், அதில் 20 மில்லியன் ரூபா ஏற்கனவே செலுத்தப்பட்டுள்ளதாக அவரது சட்டத்தரணி நீதிமன்றத்தில் தெரிவித்துள்ளார்.

மீதமுள்ள இழப்பீட்டுத் தொகையை உரிய முறையில் செலுத்தத் தவறியமை நீதிமன்ற அவமதிப்பாகும் எனக் குற்றஞ்சாட்டி தாக்கல் செய்யப்பட்ட மனுவைப் பரிசீலித்த பின்னரே இந்த உத்தரவு பிறப்பிக்கப்பட்டுள்ளது.

தலைமை நீதியரசர் பிரீத்தி பத்மன் சுரசேன தலைமையிலான மூவரடங்கிய உயர் நீதிமன்ற நீதியரசர்கள் அமர்வு இந்த உத்தரவைப் பிறப்பித்துள்ளது.