மின்சார வாகன மின்கலன்களை முறையாகச் சேகரிக்க முறையான அமைப்பு இல்லை - தணிக்கை அலுவலகம்

நாட்டில் பயன்பாட்டுக்கு உதவாத மின்சார வாகன மின்கலன்களை முறையாகச் சேகரித்தல், சேமித்தல், மறுசுழற்சி செய்தல் மற்றும் அப்புறப்படுத்துதல் ஆகியவற்றுக்கு போதுமான தேசிய மேலாண்மை அமைப்பு இன்னும் நடைமுறைப்படுத்தப்படவில்லை எனத் தெரிவிக்கப்பட்டுள்ளது.

 தேசிய தணிக்கை அலுவலகம் நேற்று வெளியிட்ட அறிக்கையில் இந்த விடயம் தெரிவிக்கப்பட்டுள்ளது. 

 குறித்த அறிக்கையில் மேலும் தெரிவிக்கப்பட்டுள்ளதாவது, இலங்கையில் மின்சார வாகனங்களின் பயன்பாடு, பயன்பாட்டிற்குப் பிந்தைய மேலாண்மை மற்றும் சுற்றுச்சூழல் தாக்கம் குறித்து வெளியிடப்பட்ட ஒரு சிறப்புத் தணிக்கை அறிக்கையின் மூலம் இது தெரியவந்துள்ளது.

 2020-ல் அறிமுகப்படுத்தப்பட்ட தேசிய கழிவு மேலாண்மைக் கொள்கையின் கீழ், பயன்பாட்டுக்கு உதவாத மின்சார வாகன மின்கலன்களை நிர்வகிப்பதற்கான திட்டம் திறம்பட நடைமுறைப்படுத்தப்படவில்லை என்றும் அந்தத் தணிக்கை அறிக்கை குறிப்பிட்டுள்ளது. 

 குறிப்பாக, மின்கலன்களைச் சேகரித்தல், மறுசுழற்சி செய்தல், அவற்றின் பயணப் பாதையைக் கண்காணித்தல் மற்றும் சுற்றுச்சூழலுக்கு உகந்த முறையில் அப்புறப்படுத்துதல் ஆகியவற்றுக்கு ஒரு ஒருங்கிணைந்த நிறுவன அமைப்பு நிறுவப்படவில்லை என்று அது குறிப்பிடுகிறது. 

 மின்கல மேலாண்மையில் ஈடுபட்டுள்ள அரசாங்க நிறுவனங்களுக்கு இடையேயான ஒருங்கிணைப்பும் குறைவாகவே உள்ளது என்றும் தணிக்கை அலுவலகம் சுட்டிக்காட்டியுள்ளது. தணிக்கையின் போது நடத்தப்பட்ட கள ஆய்வுகளில், பயன்படுத்தப்பட்ட சில மின்கலன்கள் திறந்தவெளிகளில் சேமிக்கப்பட்டு, பெரிய பைகளில் அடைக்கப்படுவது தெரியவந்துள்ளது.

 இத்தகைய நடைமுறைகள் தொழிலாளர்களின் பாதுகாப்புக்கும் சுற்றுச்சூழலுக்கும் அபாயங்களை ஏற்படுத்தக்கூடும் என்றும் அந்தத் தணிக்கை அறிக்கை குறிப்பிடுகிறது. மின்சார வாகன மின்கல மேலாண்மைத் துறை தற்போது அதன் ஆரம்பகட்ட வளர்ச்சியில் உள்ளது. 

மேலும், மின்கலங்களைத் திரும்பப் பெறுவதற்கான முறையான தேசிய அமைப்போ அல்லது விரிவான கண்காணிப்பு அமைப்போ இல்லை என்பது தெரியவந்துள்ளது. 

 மின்கலங்களைச் சேமிப்பதற்கும் கொண்டு செல்வதற்கும் தரப்படுத்தப்பட்ட நடைமுறைகள் இல்லாததால், இத்துறை பெரும்பாலும் தற்காலிக வணிக ஏற்பாடுகளின் அடிப்படையிலேயே இயங்குகிறது என்றும் அந்தத் தணிக்கை அறிக்கை வெளிப்படுத்தியுள்ளது. 

 இருப்பினும், ஆயுட்காலம் முடிந்த மின்சார வாகன மின்கலங்களைப் பெருமளவில் அப்புறப்படுத்தும் நிலையை இலங்கை இன்னும் எட்டவில்லை என்றும் அந்த அறிக்கை குறிப்பிடுகிறது.