சாவகச்சேரியில் ஆறுதல் பராமரிப்பு நிலையம் திறந்து வைப்பு!
யாழ்ப்பாணம், சாவகச்சேரியில் நீண்டகால மற்றும் தீவிர நோய்களால் பாதிக்கப்பட்டவர்களுக்கு ஆறுதல் பராமரிப்பு வழங்கும் நோக்கில் அமைக்கப்பட்டுள்ள “Comfort Care Home – Hospice” ஆறுதல் பராமரிப்பு நிலையம் இன்று (24) உத்தியோகபூர்வமாகத் திறந்து வைக்கப்பட்டது.
இந்நிகழ்வில் வடக்கு மாகாண ஆளுநர், அமைச்சர், நாடாளுமன்ற உறுப்பினர்கள், அரசாங்க அதிபர்கள் மற்றும் பல்வேறு துறைகளைச் சேர்ந்த உயர்மட்ட அரச அதிகாரிகள் கலந்துகொண்டனர்.
அத்துடன், யாழ்ப்பாணம் போதனா வைத்தியசாலையைச் சேர்ந்த வைத்தியர் த. சத்தியமூர்த்தி உள்ளிட்ட மருத்துவத் துறைப் பிரதிநிதிகள், தொண்டு நிறுவனங்கள் மற்றும் பல்வேறு அமைப்புகளின் பிரதிநிதிகளும் நிகழ்வில் பங்கேற்றனர்.
நீண்டகால மற்றும் தீவிர நோய்களால் பாதிக்கப்பட்ட நோயாளிகளின் உடல் மற்றும் உள நலனைப் பேணுதல், அவர்களின் வலிகளைக் குறைத்தல் மற்றும் கண்ணியமான சூழலில் பராமரிப்பை வழங்குதல் ஆகியவற்றை நோக்கமாகக் கொண்டு இத்தகைய ஆறுதல் பராமரிப்பு நிலையங்கள் செயற்படுகின்றன.
சாவகச்சேரியில் இந்த நிலையம் திறந்து வைக்கப்பட்டுள்ளமை, வடக்கு மாகாணத்தில் நோயாளிகளுக்கான ஆறுதல் பராமரிப்புச் சேவைகளை விரிவுபடுத்துவதற்கான முக்கியமான முன்னெடுப்பாகக் கருதப்படுகிறது.
நோயாளிகளுக்கு மட்டுமன்றி, அவர்களைப் பராமரிக்கும் குடும்பத்தினருக்கும் ஆதரவளிக்கும் இத்தகைய சேவைகள், நோயின் இறுதிக்கட்டத்திலும் மனிதாபிமானத்துடனும் கண்ணியத்துடனும் பராமரிப்பைப் பெற்றுக்கொள்வதற்கான வாய்ப்பை ஏற்படுத்துகின்றன.
