கிரிக்கெட் வீரர்களைத் தெரிவு செய்வதில் பாரபட்சம் காட்டப்படுவது ஏன்? - விளையாட்டுத்துறை அமைச்சர் விளக்கம்!
இலங்கையின் தேசிய கிரிக்கெட் வீரர்களைத் தெரிவு செய்யும் செயல்முறை, அவர்களின் இனம் அல்லது பிராந்திய பின்னணியை அடிப்படையாகக் கொண்டதல்ல; மாறாக, வீரர்களின் திறமை மற்றும் செயல்பாடுகளையே அடிப்படையாகக் கொண்டது என்று விளையாட்டுத்துறை அமைச்சர் சுனில் குமார கமகே தெரிவித்துள்ளார்.
நாடாளுமன்றத்தில் எழுப்பப்பட்ட கேள்வி ஒன்றுக்கு பதிலளித்த அமைச்சர், தேசிய அணிக்கான வீரர்களைத் தெரிவு செய்யும் பொறுப்பு, சுதந்திரமான கிரிக்கெட் தெரிவுக்குழுவிடம் உள்ளது என்று கூறினார்.
கிரிக்கெட் வீரர்கள் மிலன் ரத்நாயக்க மற்றும் விஜயகாந்த் வியாஸ்காந்த் ஆகியோருக்கு, அவர்களின் சிறப்பான செயல்பாடுகள் இருந்தபோதிலும், போதிய வாய்ப்புகள் வழங்கப்படவில்லை என்பது குறித்த கவலைகளை நாடாளுமன்ற உறுப்பினர் ஒருவர் எழுப்பினார்.
தற்போது பாகிஸ்தானில் சுற்றுப்பயணம் மேற்கொண்டுள்ள இலங்கை அணியில், மேல் மாகாணம் மற்றும் தென் மாகாணத்தைச் சேர்ந்த வீரர்களே பெருமளவில் இடம்பெற்றுள்ளதைச் சுட்டிக்காட்டிய அந்த உறுப்பினர், குறிப்பிட்ட சில பிராந்தியங்களைச் சேர்ந்த வீரர்களுக்கு மட்டும் ஏன் அதிக வாய்ப்புகள் வழங்கப்படுகின்றன என்று கேள்வி எழுப்பினார்.
மேலும், பிற பிராந்தியங்களைச் சேர்ந்த திறமையான வீரர்களுக்குச் சமமான வாய்ப்புகள் கிடைப்பதை உறுதி செய்ய விளையாட்டுத்துறை அமைச்சகம் தலையிடுமா என்றும் அவர் வினவினார்.
இதற்குப் பதிலளித்த அமைச்சர் கமகே, வீரர்களைத் தெரிவு செய்யும்போது தெரிவுக்குழு பல்வேறு காரணிகளைக் கருத்தில் கொள்கிறதே தவிர, இனம் அல்லது புவியியல் பின்னணியை ஒரு அளவுகோலாகப் பயன்படுத்துவதில்லை என்று தெரிவித்தார்.
மேலும், இந்த இரு வீரர்கள் குறித்த கவலைகளைத் தெரிவுக்குழுவின் கவனத்திற்குக் கொண்டு சென்று, அவர்களின் செயல்பாடுகளைக் கருத்தில் கொள்ளுமாறு கேட்டுக்கொள்ள முடியும் என்றும் அவர் குறிப்பிட்டார்.
