ஒன்பது வருடங்களுக்கு பிறகு டெல்லி சிறையிலிருந்து விடுவிக்கப்பட்ட பிரிட்டிஷ் சீக்கிய ஆர்வலர்
செப்டம்பர் 18 அன்று ஜாமீனில் விடுவிக்க நீதிமன்றம் உத்தரவிட்டிருந்தும், அவரைத் தொடர்ந்து சிறையில் வைத்திருக்க முயற்சிப்பது நீதிமன்ற அவமதிப்பாகக் கருதப்படும் என்று இந்திய உயர் நீதிமன்றம் எச்சரித்ததைத் தொடர்ந்து, பிரிட்டிஷ் சீக்கிய ஆர்வலர் ஜக்தார் சிங் ஜோஹல் டெல்லி சிறையிலிருந்து விடுவிக்கப்பட்டுள்ளார்.
ஜோஹல் முழுமையான விசாரணை ஏதுமின்றி ஒன்பது ஆண்டுகளாகச் சிறையில் அடைக்கப்பட்டிருந்தார் என்பது குறிப்பிடத்தக்க விடயமாகும்.
பயங்கரவாதக் குற்றச்சாட்டுகளின் பேரில் ஜோஹல் ஒன்பது ஆண்டுகளாகத் தடுத்து வைக்கப்பட்டிருந்தது இங்கிலாந்து மற்றும் இந்தியா இடையே தூதரக ரீதியான பதற்றத்தை ஏற்படுத்தியிருந்தது.
இருப்பினும், அவரை விடுவிப்பதற்கோ அல்லது முழுமையான விசாரணைக்கு உட்படுத்துவதற்கோ பிரிட்டிஷ் அரசாங்கம் போதுமான அளவு தீவிர நடவடிக்கை எடுக்கவில்லை என்று பிரச்சாரகர்கள் குற்றம் சாட்டியுள்ளனர்.
2016-17 காலகட்டத்தில் பஞ்சாபில் குறிவைத்து நடத்தப்பட்ட கொலைகள் தொடர்பான பன்னாட்டுத் தீவிரவாதச் சதித்திட்டம் ஒன்றுக்கு நிதியளிப்பதற்காக ஜோஹல் பிரான்சுக்கு 3,000 பவுண்டுகள் தொகையை அனுப்பினார் என்ற தங்கள் குற்றச்சாட்டை உறுதிப்படுத்த நம்பகமான சாட்சிகளைத் திரட்டுவதில் இந்திய அரசுக்கு ஏற்பட்ட இயலாமையே, அவரது வழக்கு முழுமையான விசாரணைக்கு வராமல் போனதற்கான முக்கிய காரணம் என ஆதரவாளர்கள் தரப்பு தெரிவிக்கின்றனர்.
