1000க்கும் மேற்பட்ட நிலநடுக்கங்களை தூண்டும் வட கொரியாவின் அணு ஆயுதச் சோதனைகள்

வட கொரியாவின் அணு ஆயுதச் சோதனைகள், அதன் முக்கிய அணு ஆயுதச் சோதனைத் தளத்தைச் சுற்றியுள்ள பகுதிகளில் நிலநடுக்கங்களின் எண்ணிக்கையை அதிகரித்திருக்கலாம் என்று தெரியவந்துள்ளது.

2017ல் அந்நாடு நடத்திய கடைசிச் சோதனைக்குப் பிறகும் இந்த நிலநடுக்கச் செயல்பாடுகள் தொடர்ந்து நடைபெற்று வருகின்றன. 

மேலும், காலப்போக்கில் இந்த நிலநடுக்கங்களின் எண்ணிக்கையும் தீவிரமும் அதிகரித்து வருவதாக அந்தப் புதிய ஆய்வு கண்டறிந்துள்ளது.

கடந்த 2,000 ஆண்டுகளாக 'மண்டாப்' (Mantap) மலையும் அதைச் சுற்றியுள்ள பகுதியும் நிலநடுக்கங்கள் ஏதுமின்றி அமைதியாக இருந்தன. 

ஆனால், 2006 முதல் 2017 வரை வட கொரியா அங்கு ஆறு நிலத்தடி அணு ஆயுதச் சோதனைகளை நடத்திய நிலையில், 2008 முதல் 2025 வரையிலான நில அதிர்வுத் தரவுகளை ஆராய்ந்த விஞ்ஞானிகள், அம்மலையைச் சுற்றி 1,399 நிலநடுக்கங்கள் நிகழ்ந்திருப்பதைக் கண்டறிந்துள்ளனர்.

அணு ஆயுத வெடிப்புகளுடன் தொடர்புடைய நிலநடுக்கங்கள் பொதுவாகச் சோதனைக்குப் பிறகு பல ஆண்டுகளுக்குத் தொடர்ந்து அதிகரிப்பதில்லை என்பதால், இந்த ஆய்வு முடிவுகள் வழக்கத்திற்கு மாறானவையாகக் கருதப்படுகின்றன. 

வட கொரியாவின் மூன்றாவது அணு ஆயுதச் சோதனைக்குப் பிறகு, 2013ல் அப்பகுதியில் முதல் நிலநடுக்கம் பதிவானது. ஆனால், அதைத் தொடர்ந்து வந்த ஆண்டுகளில் மிகக் குறைவான நிலநடுக்கங்களே நிகழ்ந்தன. 

2017ல் அந்நாடு தனது ஆறாவது மற்றும் மிகப்பெரிய அணு ஆயுதச் சோதனையை நடத்திய பிறகு நிலைமை மாறியது.