இலங்கையின் மனித உரிமைகள் தொடர்பான தற்போதைய நிலை குறித்து அறிக்கை வெளியீடு

ஐக்கிய நாடுகள் மனித உரிமைகள் பேரவையின் 63வது அமர்வில் சமர்ப்பிக்கப்படவுள்ள இலங்கையின் மனித உரிமைகள் நிலைமை குறித்த அறிக்கை தற்போது பகிரங்கப்படுத்தப்பட்டுள்ளது.

செப்டம்பர் 07 ஆம் திகதி இந்த சபை கூடவுள்ள நிலையில் அந்த அறிக்கை பகிரங்கப்படுத்தப்படவுள்ளது. 

இதற்கமைய ஐ.நா. மனித உரிமைகள் உயர் ஆணையர் வோல்கர் துர்க் வெளியிட்டுள்ள குறித்த அறிக்கையில், அரசியலமைப்புச் சீர்திருத்தங்கள், பயங்கரவாதத் தடுப்புச் சட்டத்தை ரத்து செய்தல், அரசியல் கைதிகளை விடுவித்தல் மற்றும் பொறுப்புக்கூறல் போன்ற பெரும் மாற்றங்களை உறுதியளித்து தற்போதைய அரசாங்கம் ஆட்சிக்கு வந்தது என்பது நினைவுகூரப்பட்டுள்ளது.

இருப்பினும், பயங்கரவாதத் தடுப்புச் சட்டத்தை அரசாங்கம் தொடர்ந்து அமல்படுத்துவது, தன்னிச்சையான கைதுகளுக்கும், குற்றச்சாட்டு இன்றி நீண்டகால தடுப்புக்காவலுக்கும் வழிவகுத்துள்ளது என்றும் சுட்டிக்காட்டப்பட்டுள்ளது. 

2025-ஆம் ஆண்டில் காவலில் அல்லது தடுப்புக்காவலில் 18 மரணங்களும், ஏப்ரல் 2026 நிலவரப்படி 3 சம்பவங்களும் பதிவாகியுள்ளன என்றும், மேலும் 2025-ஆம் ஆண்டில் 602 சித்திரவதை மற்றும் மனிதாபிமானமற்ற நடத்தை சம்பவங்களும், ஏப்ரல் 2026 நிலவரப்படி 138 சம்பவங்களும் பதிவாகியுள்ளதாகவும் தெரிவிக்கப்பட்டுள்ளது. 

ஈஸ்டர் ஞாயிறு பயங்கரவாதத் தாக்குதல் போன்ற பல வழக்குகளில் முன்னேற்றம் ஏற்பட்டிருந்தாலும், போரின் போது இழைக்கப்பட்ட கடுமையான மனித உரிமை மீறல்களுக்கு உறுதியான பொறுப்புக்கூறல் எதுவும் இல்லை என்றும் சுட்டிக்காட்டப்பட்டுள்ளது. 

குற்றவியல் புலனாய்வுத் துறை அல்லது பயங்கரவாதப் புலனாய்வுப் பிரிவு உள்ளிட்ட இராணுவ மற்றும் குடிசார் உளவுத்துறை அதிகாரிகளால், குடிமைச் சமூக ஆர்வலர்கள் மற்றும் பத்திரிகையாளர்களுக்கு எதிராக அரசு அளவிலான கண்காணிப்பு, அச்சுறுத்தல் மற்றும் பழிவாங்கும் நடவடிக்கைகள் இந்த ஆட்சியிலும் தொடர்வதாகவும் கூறப்பட்டுள்ளது. 

இந்நிலையில் பயங்கரவாதத் தடுப்புச் சட்டத்தை உடனடியாக ரத்து செய்து, அதன் அமலாக்கத்திற்குத் தற்காலிகத் தடை விதித்து, ஒரு புதிய சட்டத்தை மீண்டும் கொண்டுவர வேண்டும் என்று ஐக்கிய நாடுகள் மனித உரிமைகள் உயர் ஆணையர் அலுவலகம் பரிந்துரைத்துள்ளது. 

அதேநேரம் வடக்கு மற்றும் கிழக்குப் பகுதிகளில் இராணுவத்தின் கட்டுப்பாட்டில் உள்ள நிலங்களை விடுவிக்கவும், மேலும் நிலங்கள் கையகப்படுத்துவதை நிறுத்தவும், பயங்கரவாதத் தடுப்புச் சட்டத்தின் கீழ் நீண்ட காலமாகத் தடுத்து வைக்கப்பட்டுள்ள கைதிகளை விடுவிக்கவும் பரிந்துரைக்கப்பட்டுள்ளது. 

கூடுதலாக, கருத்துச் சுதந்திர உரிமையைக் கட்டுப்படுத்தும் இணையப் பாதுகாப்புச் சட்டம், சர்வதேச குற்றவியல் மற்றும் மக்கள் தொடர்புச் சட்டம் (ICCPR) மற்றும் அரசு சாரா நிறுவனங்களுக்கான வரைவுச் சட்டம் ஆகியவற்றைத் திருத்தவோ அல்லது இரத்து செய்யவோ முன்மொழியப்பட்டுள்ளது. 

 

இச்செய்திக்கு பிரதான அனுசரணை

வீடியோ இங்கே