புங்குடுதீவில் தோழர் றஜீவன் எம்பி: குடிநீர் தாங்கிகள் வழங்கி வைப்பு, வீதிப் பணிகளும் நேரில் ஆய்வு!

தேசிய மக்கள் சக்தியின் யாழ்ப்பாண மாவட்ட நாடாளுமன்ற உறுப்பினர் தோழர் ஜெயசந்திரமூர்த்தி றஜீவன் அவர்கள், புங்குடுதீவுப் பகுதிக்கு உத்தியோகபூர்வ விஜயம் ஒன்றை மேற்கொண்டு, அப்பகுதி மக்களின் அத்தியாவசியத் தேவைகள் மற்றும் உட்கட்டமைப்பு அபிவிருத்திகள் குறித்து நேரில் ஆராய்ந்துள்ளார்.

இந்த விஜயத்தின் போது, புங்குடுதீவுப் பகுதியில் தூய குடிநீரைப் பெற்றுக்கொள்வதில் நீண்டகாலமாக சிரமங்களை எதிர்கொண்டு வந்த தெரிவு செய்யப்பட்ட பல குடும்பங்களுக்கு நீர் தாங்கிகள் (Water Tanks) வழங்கி வைக்கப்பட்டன.

நயினாதீவுக்கான முக்கிய போக்குவரத்து முனையமான குறிகட்டுவான் பகுதிக்குச் சென்ற நாடாளுமன்ற உறுப்பினர், அங்கு தற்போது நடைபெற்று வரும் நயினாதீவுக்கான பாதையின் திருத்தப் பணிகளின் முன்னேற்றத்தை நேரில் பார்வையிட்டார். 

அத்துடன், அப்பகுதி மக்களின் தினசரி போக்குவரத்துத் தேவைகள் மற்றும் எதிர்கொள்ளும் சவால்கள் குறித்தும் பொதுமக்களுடன் விரிவாகக் கலந்துரையாடினார்.

தொடர்ந்து, புங்குடுதீவு ஆயுர்வேத வைத்தியசாலைக்கு விஜயம் செய்த தோழர் றஜீவன், அங்கு பொதுமக்களுக்கு வழங்கப்பட்டு வரும் சுகாதார சேவைகளின் தரம் குறித்துக் கேட்டறிந்ததுடன், வைத்தியசாலையின் தற்போதைய தேவைகள் மற்றும் குறைபாடுகள் குறித்தும் அதிகாரிகளுடன் கலந்துரையாடினார்.

இந்த விஜயம் குறித்துக் கருத்துத் தெரிவித்த நாடாளுமன்ற உறுப்பினர் தோழர் றஜீவன்; "மக்களின் அன்றாட வாழ்வாதாரத் தேவைகள் முதல் அடிப்படை உட்கட்டமைப்பு மற்றும் சுகாதார சேவைகள் வரை அனைத்துத் துறைகளிலும் மக்கள் மையப்படுத்தப்பட்ட அபிவிருத்தியை (People-Centered Development) முன்னெடுப்பதே தேசிய மக்கள் சக்தியின் (NPP) உறுதியான நோக்கமாகும். 

அந்த வகையில் தீவக மக்களின் அடிப்படைப் பிரச்சினைகளுக்கு முன்னுரிமை வழங்கி அவை விரைந்து தீர்த்து வைக்கப்படும்" எனக் குறிப்பிட்டார்.

இச்செய்திக்கு பிரதான அனுசரணை

வீடியோ இங்கே