நவீன விளையாட்டுகளுக்கு மத்தியில், தமிழ் மக்களின் பாரம்பரிய மற்றும் கலாசார அடையாளங்களை பிரதிபலிக்கும் வகையிலான கிராமிய விளையாட்டுப் போட்டிகள் இங்கு நடத்தப்பட்டன.

சிறுவர்கள் முதல் பெரியவர்கள் வரை அனைத்து வயதினரும் பங்கேற்கும் வகையில் போட்டிகள் வடிவமைக்கப்பட்டிருந்தன. மட்டக்களப்பு – ஏறாவூர்ப்பற்று (செங்கலடி) பிரதேசத்தின் மயிலம்பாவெளி மற்றும் அதனைச் சுற்றியுள்ள கிராமங்களைச் சேர்ந்த நூற்றுக்கணக்கான பொதுமக்கள், குடும்பம் குடும்பமாக வருகை தந்து சித்திரை விழாவைக் கொண்டாடினர்.

இந்நிகழ்வில் கலந்துகொண்ட நாடாளுமன்ற உறுப்பினர்களான ஞா. சிறிநேசன் மற்றும் வைத்தியர் இ. சிறிநாத் ஆகியோர் கருத்துத் தெரிவிக்கையில், "இவ்வாறான கிராமிய விளையாட்டு விழாக்கள் வெறும் பொழுதுபோக்கு நிகழ்வுகள் மட்டுமல்ல; அவை போருக்குப் பின்னரான எமது சமூகக் கட்டமைப்பில், இளைய தலைமுறையினரிடையே ஒற்றுமையையும், நல்லிணக்கத்தையும், கூட்டுப்பண்பையும் வளர்க்கும் முக்கிய தளங்களாக விளங்குகின்றன" எனத் தூரநோக்குடன் சுட்டிக்காட்டினர்.

ஏறாவூர்ப்பற்று பிரதேச சபை தவிசாளர் மு. முரளிதரன் மற்றும் உறுப்பினர் வே. புவிதாசன் ஆகியோர் கிராம மட்டங்களில் விளையாட்டுக் கழகங்கள் முன்னெடுக்கும் இத்தகைய முயற்சிகள், பாரம்பரிய கலைகள் அழிந்துபோகாமல் பாதுகாக்க உதவும் எனத் தங்களது வாழ்த்துரைகளில் குறிப்பிட்டனர்.

மயிலம்பாவெளி வெண்புறா விளையாட்டுக் கழகத்தின் ஏற்பாட்டில், சித்திரை புத்தாண்டை முன்னிட்டு பிரம்மாண்ட பாரம்பரிய விளையாட்டு விழா நடைபெற்றது. 

பிரதேச சபை உறுப்பினர் வே. புவிதாசன் தலைமையில் நடைபெற்ற இவ்விழாவில், நாடாளுமன்ற உறுப்பினர்களான ஞா. சிறிநேசன், வைத்தியர் இ. சிறிநாத் உட்படப் பல முக்கிய பிரமுகர்கள் கலந்துகொண்டு, வெற்றியீட்டிய வீரர்களுக்குப் பரிசில்களை வழங்கிப் பாராட்டினர். 

இந்நிகழ்வு அப்பகுதி மக்களிடையே பெரும் சமூக ஒற்றுமையை ஏற்படுத்தியுள்ளதாகப் பலரும் வரவேற்புத் தெரிவித்துள்ளனர்.

லங்கா4 (Lanka4)

(வீடியோ இங்கே )

இச்செய்திக்கு பிரதான அனுசரணை

வீடியோ இங்கே