இலங்கை மண்ணில் பிறந்த கரிஷ் என்ற ஒரு சாதாரண பையனின் வாழ்க்கை, 2025 உயர்தரப் பரீட்சை முடிவுடன் ஒரு அசாதாரண வெற்றிக்கதையாக மாறியது. 

ஆனால் அந்த வெற்றியின் பின்னால் கண்ணீரும், பட்டினியும், இருளிலும் படித்த இரவுகளும் இருந்தன. அவரது தந்தை சிறுவயதிலேயே இறந்துவிட்டார். 

வீட்டில் தாய் ஒருத்தி மட்டும் தான் குடும்பத்தை தாங்கும் உயிர். வாழ்க்கையை நடத்த தாய் அதிகாலை எழுந்து இடியப்பம், தோசை சுட்டு விற்பார். அந்த வேலைக்கு உதவ அதிகாலை எழுவது கரிஷின் தினசரி பழக்கம். காலை உணவு விற்றுவிட்டு தான் அவன் பள்ளிக்கூடம் போவான்.

பல நாட்கள் காலையுணவு கூட சாப்பிடாமல் பள்ளிக்கு சென்றிருக்கிறான். அவன் பள்ளிக்கூடம் பேருந்தில் அல்ல, சைக்கிளில் அல்ல – நடந்து போவான். வெயிலும் மழையும் அவனை நிறுத்தவில்லை. ஏனெனில் அவனுக்கு ஒரு கனவு இருந்தது – மருத்துவராக வேண்டும். வீட்டில் படிக்க மின்சாரம் கூட சில நேரங்களில் இருக்காது. 

அப்போது அவன் வீட்டில் உட்கார்ந்து அழவில்லை. பக்கத்து கோயிலில் இருந்த லைட்டின் கீழ் புத்தகம் எடுத்துப் படித்தான். சில நேரங்களில் இரவு வேலைக்கு போய் யானைக்கு காவலாகவும் நின்றிருக்கிறான்.

தூக்கம் இல்லாமல் இருந்தாலும், படிப்பை மட்டும் அவன் விடவில்லை. அவனுக்கு செலவு அதிகம் என்பதால் அவனது தங்கை பத்தாம் வகுப்போடு படிப்பை பாதியில் கைவிட்டாள். அவனுக்கு உதவியாக பக்கத்து ஊரில் உயர்தரம் படித்த முகுந்தன் என்ற அண்ணன் இருந்தார்.

புத்தகங்கள், குறிப்புகள், சில நேரம் பண உதவி – அவன் முடிந்த உதவிகளை செய்தார். அந்த உதவியும் கரிஷின் வாழ்க்கையில் பெரிய மாற்றம் கொண்டுவந்தது.

 பல வருட கஷ்டத்திற்குப் பிறகு 2025 உயர்தரப் பரீட்சை முடிவு வந்த நாள் – அவன் ஆனந்த கண்ணீரில் மூழ்கினான். உயிரியல் பிரிவில் 3A சித்தியடைந்தான்.

மருத்துவ பீடத்திற்கு தெரிவு. அன்று அவன் தாய் அழுதார். தோல்விக்காக அல்ல. மகனின் வெற்றிக்காக. இடியப்பம் சுட்ட கைகளால் மருத்துவரை உருவாக்கிய தாய்.

 பணம் இல்லாதது தோல்வி அல்ல லைட் இல்லாதது தடையாகாது காலணி இல்லாமல் நடந்தாலும் இலக்கு அடையலாம் உதவி செய்யும் ஒரு மனிதன் வாழ்க்கையை மாற்றலாம் கஷ்டம் இருக்கும் இடத்தில்தான் பெரிய வெற்றி பிறக்கும் நினைவில் வைத்துக்கொள்ளுங்கள்: “சுகத்தில் படித்து வெற்றி பெறுவது சாதாரணம்.

கஷ்டத்தில் படித்து வெற்றி பெறுவது வரலாறு.” முடியாதது என்று ஒன்றும் இல்லை.தேவையற்ற விடயங்களில் கவனத்தை செலுத்தாமல் படிப்பில் கவனத்தை செலுத்தினால் நிச்சயமாக சாதனை படைக்கலாம். வாழ்த்துக்கள்

லங்கா4 (Lanka4)

(வீடியோ இங்கே )