இலங்கையில் ரூபாவின் பெறுமதியதிகரித்தும் கையடக்க தொலைபேசிகளின் விலைகளில் மாற்றமில்லை

அமெரிக்க டொலருக்கு நிகரான ரூபாவின் பெறுமதி அதிகரிப்பின் பலன்களை கையடக்கத் தொலைபேசிகள் மற்றும் அதன் உபகரணங்களின் விற்பனை மூலம் வழங்க முடியாது உள்ளது என அகில இலங்கை தொடர்பாடல் உரிமையாளர்கள் சங்கம் (ACCOA) தெரிவித்துள்ளது.

 ACCOA தலைவர் இந்திரஜித் பெரேரா அவர்கள் இன்னும் குறைந்த விலையில் எதையும் பெறவில்லை என்று பத்திரிகையொன்றுக்கு தெரிவித்தார். இலங்கை ரூபாவின் பெறுமதி உயர்வடைந்ததன் பலனை மக்களிடம் கொண்டு சேர்ப்பதாக அரசாங்கம் அறிவித்திருந்த போதிலும், கையடக்கத் தொலைபேசிகள், துணைக்கருவிகள், நகல் காகிதங்கள் போன்றவற்றின் விலைக் குறைப்பு எதுவும் இதுவரையில் இடம்பெறவில்லை.

அவர் "முன்பு ரூ.1,500க்கு விற்கப்பட்ட அடிப்படை மொபைல் போன், இன்னும் ரூ.4,500 என்ற வரம்பில் உள்ளது. அமெரிக்க டொலர் விலை குறைந்தாலும், எங்களுக்கு இன்னும் நிவாரணம் கிடைக்கவில்லை," என்றார்.

 “இலங்கை மத்திய வங்கி கடன் கடிதங்களை (LCs) திறப்பது தொடர்பான பல நிபந்தனைகளை தளர்த்தியுள்ள போதிலும், பெரிய அளவிலான இறக்குமதியாளர்களிடமிருந்து எங்களுக்கு எந்த நிவாரணமும் கிடைக்கவில்லை. 

சிறிய அளவிலான வர்த்தகர்களாகிய நாம் இன்னும் அவர்களிடமிருந்து பொருட்களை வாங்க வேண்டியுள்ளது” என்று பெரேரா கூறினார்.டொலர் மதிப்பு குறைந்த பிறகு பெரிய அளவிலான இறக்குமதியாளர்களுக்கு எந்த நிவாரணமும் கிடைக்கவில்லை என்றும் அதனால் சிறிய அளவிலான விற்பனையாளர்களுக்கு எந்த சலுகையும் வழங்க முடியவில்லை என்றும் ACCOA கூறியுள்ளது.

 எனவே, நுகர்வோர் விவகார அதிகாரசபை (CAA) அல்லது இலங்கை தொலைத்தொடர்பு ஒழுங்குமுறை ஆணைக்குழு (TRCSL) இந்தப் பிரச்சினைகளில் தலையிட்டு ஒழுங்குபடுத்த வேண்டும் என பெரேரா மேலும் தெரிவித்தார்.

 "கையடக்கத் தொலைபேசிகளின் இறக்குமதி மட்டுப்படுத்தப்பட்ட போதிலும், நாட்டிற்கு தொலைபேசிகளைக் கொண்டுவருவதற்கு பல்வேறு கதவுகள் திறக்கப்பட்டுள்ளன. எனினும், சில்லறை சந்தையில் இந்த கையடக்கத் தொலைபேசிகள் அதிக விலைக்கு விற்கப்படுகின்றன," என்று இந்திரஜித் பெரேரா வேதனையுடன் தெரிவித்தார்.