தான் உயிரிழக்கக்கூடும் என்று சிறையிலிருந்து கடிதம் எழுதிய பாகிஸ்தான் முன்னாள் பிரதமர் இம்ரான் கான்
2023ம் ஆண்டு ஆகஸ்ட் மாதம் முதல் சிறையில் அடைக்கப்பட்டுள்ள பாகிஸ்தானின் முன்னாள் பிரதமர் இம்ரான் கான், தனது உடல்நிலை மோசமடைந்து வருவதால் சிறையிலேயே தான் உயிரிழக்கக்கூடும் என்று எச்சரித்துள்ளார்.
மேலும், தனக்கும் தனது மனைவி புஷ்ரா பிபிக்கும் முறையான மருத்துவ சிகிச்சை கிடைப்பதை உறுதி செய்யுமாறு அந்நாட்டின் உயர் நீதிபதிகளிடம் அவர் வேண்டுகோள் விடுத்துள்ளார்.
தனது வழக்கறிஞர் வாயிலாக உச்ச நீதிமன்றம், கூட்டாட்சி அரசியலமைப்பு நீதிமன்றம் மற்றும் இஸ்லாமாபாத் உயர் நீதிமன்றத்தின் தலைமை நீதிபதிகளுக்கு எழுதியுள்ள திறந்த கடிதத்தில், தனக்கு முறையான மருத்துவ சிகிச்சை வழங்கப்படவில்லை என்று அவர் குறிப்பிட்டுள்ளார்.
74 வயதான இம்ரான் கான், தனது மருத்துவ சிகிச்சை மற்றும் சிறை நிலைமைகள் தொடர்பாக ஏற்கனவே நீதிமன்றம் பிறப்பித்த உத்தரவுகளைச் செயல்படுத்த வேண்டும் என்று கோரியுள்ளார்.
"74 வயதில், இந்த இடைவிடாத நெருக்கடியான சூழல் என்னை ஒரு நிலைக்குத் தள்ளியுள்ளது; அங்கிருந்து நான் உயிருடன் திரும்புவேனா என்பது சந்தேகமே" என்று அவர் அந்தக் கடிதத்தில் தெரிவித்துள்ளார்.
அவரது வழக்கறிஞர் பாரிஸ்டர் சல்மான் சஃப்தார், கடந்த வாரம் அடிலா சிறையில் இம்ரான் கானைச் சந்தித்த சில நாட்களுக்குப் பிறகு, திங்கள்கிழமை அன்று இந்தக் கடிதத்தை 'எக்ஸ்' (X) தளத்தில் பகிர்ந்துள்ளார்.