இஸ்ரேலில் ஆட்சியை கவிழ்க்குமா அரபுக் கட்சிகள்? நெதன்யாகுவுக்கு நெருங்கும் நெருக்கடி!
இஸ்ரேலின் 2026 பொது நாடாளுமன்றத் தேர்தலின் இறுதி வாக்கு எண்ணிக்கை, பிரதமர் பெஞ்சமின் நெதன்யாகு தலைமையிலான வலதுசாரி அணி 53 இடங்களை மட்டுமே பெற்றுள்ளதை உறுதிப்படுத்தியுள்ளது.
அரசாங்கத்தை அமைப்பதற்குத் தேவையான 61 இடங்கள் என்ற பெரும்பான்மையை அவர்களால் எட்ட முடியவில்லை என்று செய்தி வெளியிடப்பட்டுள்ளது.
இதற்கிடையில், எதிர்க்கட்சி அணி 48 இடங்களைப் பெற்றுள்ளதாக, வெளியிடப்பட்ட மத்திய தேர்தல் குழுவின் புள்ளிவிவரங்கள் தெரிவிக்கின்றன.
இரு அணிகளுமே 61 இடங்கள் கொண்ட அறுதிப் பெரும்பான்மையைப் பெறத் தவறியுள்ள நிலையில், மொத்தம் 19 இடங்களைக் கைப்பற்றியுள்ள அரபு கட்சிகள், அரசாங்கத்தை அமைப்பதில் தீர்மானிக்கும் சக்திகளாக உருவெடுத்துள்ளன.
இந்நிலையில், நெதன்யாகு தனது பதவியை இழந்தால், அவர் இதுவரை தவிர்த்து வந்த பல சிக்கலான நிகழ்வுகள் அவருக்கு எதிராகத் திரும்பக்கூடும்.
அவர் நீண்டகாலமாக எதிர்கொண்டு வரும் ஊழல் குற்றச்சாட்டுகளுக்குப் பொறுப்பேற்க வேண்டிய சூழல் ஏற்படும்.
மேலும், 2023 அக்டோபர் 7 அன்று ஹமாஸ் நடத்திய பேரழிவுத் தாக்குதலின் போது ஏற்பட்ட பாதுகாப்பு குளறுபடிகள் குறித்து முறையான விசாரணை தொடங்கப்படுவது கிட்டத்தட்ட உறுதியாகிவிடும்.
கூட்டணி அரசாங்கத்தில் இடம் பெறாவிட்டாலும், அரபு கட்சிகள் தங்களின் வளர்ந்து வரும் செல்வாக்கைப் பயன்படுத்தி, நாடாளுமன்றத்தில் நெதன்யாகுவின் பிற எதிர்ப்பாளர்களுக்கு ஆதரவு அளிக்கக்கூடும்.
நெதன்யாகுவின் முக்கிய எதிராளியும், முன்னாள் ராணுவத் தளபதியுமான காடி ஐசென்கோட் (Gadi Eisenkot), சில நிபந்தனைகளுடன் அரபு கட்சிகளுடன் இணைந்து செயல்படத் தயாராக இருப்பதாகக் குறிப்பால் உணர்த்தியுள்ளார்.
நெதன்யாகுவின் அணி, அரபு கட்சிகள் தேர்தலை "திருடிவிட்டன" என்றும் இதற்கு வெளிநாட்டு உதவி கிடைத்திருக்கலாம் என்றும் ஆதாரமற்ற குற்றச்சாட்டுகளை முன்வைத்தது.
நெதன்யாகுவின் அணி நாடாளுமன்றத்தில் பெரும்பான்மையை இழந்துவிட்டது என்பது இறுதி முடிவுகள் மூலம் உறுதியாகவிருந்த சூழலில், இத்தகைய குற்றச்சாட்டுகள் எழுப்பப்பட்டுள்ளன.
