அர்ச்சுனா எம்.பி. உள்ளிட்ட 6 பேருக்கு சமூக வலைத்தளங்களில் பதிவிட இடைக்காலத் தடை

கல்முனை ஆதார வைத்தியசாலை வைத்திய அத்தியட்சகர் வைத்தியர் கு. சுகுணன் மற்றும் அவரது குடும்பத்தினர் தொடர்பாக சமூக வலைத்தளங்களில் பதிவுகளை வெளியிடுவதற்கு பாராளுமன்ற உறுப்பினர் அர்ச்சுனா இராமநாதன், முன்னாள் இராஜாங்க அமைச்சர் எச்.எம்.எம். ஹரீஸ் உள்ளிட்ட ஆறு பேருக்கு மட்டக்களப்பு நீதிவான் நீதிமன்றம் இடைக்காலத் தடை உத்தரவு பிறப்பித்துள்ளது.

வைத்தியர் சுகுணன் மற்றும் அவரது குடும்பத்தினர் தொடர்பில் வழக்கு நிறைவடையும் வரை பேஸ்புக் உள்ளிட்ட சமூக வலைத்தளங்களில் பதிவுகள் வெளியிடக் கூடாது என நீதிமன்றம் உத்தரவிட்டுள்ளது.

கல்முனை ஆதார வைத்தியசாலையில் சுகாதாரப் பணி உதவியாளர்களுக்கான நியமனங்கள் மற்றும் அவர்களின் ஆடை தொடர்பில் ஏற்பட்ட சர்ச்சையைத் தொடர்ந்து, வைத்தியர் சுகுணன் மற்றும் அவரது குடும்பத்தினர் தொடர்பில் அவதூறான பதிவுகள் வெளியிடப்பட்டதாக குற்றச்சாட்டு முன்வைக்கப்பட்டது.

இதனையடுத்து, அர்ச்சுனா இராமநாதன் எம்.பி., முன்னாள் இராஜாங்க அமைச்சர் எச்.எம்.எம். ஹரீஸ் உள்ளிட்ட ஆறு பேருக்கு எதிராகவும், யூடியூப் மற்றும் பேஸ்புக் தளங்களுக்கு எதிராகவும் நிகழ்நிலை காப்புச் சட்டத்தின் கீழ் வழக்குத் தாக்கல் செய்யப்பட்டது.

வழக்கு இன்று மீண்டும் விசாரணைக்கு எடுத்துக்கொள்ளப்பட்டபோது, ஆறு பேருக்கும் இடைக்காலத் தடை உத்தரவைப் பிறப்பித்த நீதிவான் அண்ணாதுரை தர்ஷினி, எதிர்வரும் ஒக்டோபர் 12ஆம் திகதி அனைவரும் நீதிமன்றில் முன்னிலையாகுமாறும் உத்தரவிட்டார்.