டெல்லியில் வாகன நிறுத்தம் தொடர்பான சண்டையில் பெண் ஒருவர் கொலை

தென்மேற்கு டெல்லியின் பிந்தாபூரில், இருசக்கர வாகனம் நிறுத்துவது தொடர்பாக ஏற்பட்ட தகராறில் 32 வயது பெண் கத்தியால் குத்திக் கொலை செய்யப்பட்டுள்ளார். மேலும், அவரது கணவர் படுகாயம் அடைந்துள்ளார் என்று காவல்துறை தெரிவித்துள்ளது.

இந்தச் சம்பவம் பிந்தாபூர் காவல் நிலையத்தில் பதிவானது. சிலர் தனது மகளையும் மருமகனையும் வயிற்றில் கத்தியால் குத்திவிட்டதாக காவல்துறைக்கு ஒருவர் தகவல் தெரிவித்தார்.

காவல்துறை சம்பவ இடத்திற்கு வருவதற்குள், காயமடைந்தவர்கள் தீன் தயாள் உபாத்யாய் (DDU) மருத்துவமனைக்குக் கொண்டு செல்லப்பட்டிருந்தனர்.

அங்கு, ஆர்த்தி இறந்துவிட்டதாக மருத்துவர்கள் அறிவித்ததாக காவல்துறை தெரிவித்தது. கத்தியால் குத்தப்பட்ட அவரது கணவர் விக்கி, உயர் சிகிச்சைக்காக சஃப்தர்ஜங் மருத்துவமனைக்கு அனுப்பப்பட்டார்.

முதற்கட்ட விசாரணையில், சாலையில் இருசக்கர வாகனம் நிறுத்தியது தொடர்பாக தம்பதியினர் தங்கள் அண்டை வீட்டாருடன் சண்டையிட்டுக் கொண்டதை காவல்துறை கண்டறிந்தது. 

வாக்குவாதம் முற்றியதில், ஆர்த்தியும் விக்கியும் கத்தியால் குத்தப்பட்டதாகக் கூறப்படுகிறது. தாக்குதல் நடத்தியவர்கள், ஒரே பகுதியைச் சேர்ந்த 40 வயதான பப்பு மற்றும் ஒரு சிறுவன் என காவல்துறை அடையாளம் கண்டுள்ளது.