யாழ்ப்பாணம்: சாவகச்சேரி மருத்துவமனை விவகாரம் மூலம் மக்கள் மத்தியில் அறிமுகமாகி, 2024 நாடாளுமன்றத் தேர்தலில் சுயேச்சையாகப் போட்டியிட்டு களம் கண்டவர் டாக்டர் ராமநாதன் அர்ச்சுனா. 

எனினும், அண்மைக்காலமாக அவர் சந்தித்து வரும் தொடர் சட்டச் சிக்கல்களும், அரசியல் மேடைகளில் அவர் பேசி வரும் கருத்துகளும் "அவர் திட்டமிட்டு அரசியல் ரீதியாக அழிக்கப்படுகிறாரா அல்லது அவசரப்பட்டுத் தனது அரசியல் எதிர்காலத்தைத் தானே சிதைத்துக் கொள்கிறாரா?" என்ற விவாதத்தை ஈழத்து மற்றும் தமிழக அரசியல் தளங்களில் ஏற்படுத்தியுள்ளது.

திட்டமிட்ட அரசியல் சதியா? அர்ச்சுனாவின் ஆதரவாளர்கள் மற்றும் சில அரசியல் அவதானிகளின் கருத்துப்படி, பாரம்பரிய அரசியல் கட்டமைப்பை உடைத்து, எந்தவொரு பெரிய கட்சியின் பின்னணியும் இன்றி நாடாளுமன்றத்திற்குள் நுழைந்த ஒரு சுயேச்சை உறுப்பினரை முடக்கப் பல முனைகளில் இருந்து அழுத்தங்கள் பிரயோகிக்கப்படுவதாகக் கூறப்படுகிறது.

பாரம்பரிய அரசியல்வாதிகளின் எதிர்ப்பு: யாழ்ப்பாணத்தில் நீண்டகாலமாக நிலைபெற்றிருந்த அரசியல் சக்திகளை மீறி இவர் பெற்ற வெற்றி, பலருக்குப் பின்னடைவை ஏற்படுத்தியது. இதனால், அவரது ஆரம்பக்கால மருத்துவமனைச் செயல்பாடுகள் முதல் தற்போதைய நடவடிக்கைகள் வரை தீவிரமாகக் கண்காணிக்கப்பட்டு, சட்ட ரீதியான நெருக்குவாரங்கள் கொடுக்கப்படுவதாக ஒரு தரப்பு நம்புகிறது.

அண்மையில் தமிழகம் சென்று பல அரசியல் சந்திப்புகளை நிகழ்த்திய அவரது நகர்வுகள், சில அரசியல் தரப்புகளுக்குப் அதிருப்தியை ஏற்படுத்தியிருக்கலாம் என்றும், அதன் விளைவாகவே அவர் மீதான விமர்சனங்கள் தீவிரமடைந்துள்ளன என்றும் கருதப்படுகிறது. 

அவசரப் போக்கு – தானாகவே தேடிக்கொள்ளும் வீழ்ச்சியா? மறுபுறம், அர்ச்சுனா சந்திக்கும் பெரும்பாலான சிக்கல்களுக்கு அவரது முதிர்ச்சியற்ற பேச்சுக்களும், ஆக்ரோஷமான அணுகுமுறைகளுமே காரணம் என்று நடுநிலையான விமர்சகர்கள் சுட்டிக்காட்டுகின்றனர்.

கடமைகளுக்குத் இடையூறு விளைவித்த குற்றச்சாட்டு, காணி (நில) விவகாரத்தில் துப்பாக்கியைக் காட்டி மிரட்டியதாக எழுந்த புகார் என அடுத்தடுத்துப் பல வழக்குகளில் அவர் கைது செய்யப்பட்டார். 

இத்தகைய சட்ட மீறல் குற்றச்சாட்டுகள் அவரது மக்கள் செல்வாக்கைக் கடுமையாகப் பாதித்துள்ளன. நாடாளுமன்ற அவதூறுப் பேச்சு மற்றும் கொலை மிரட்டல்: இலங்கைப் நாடாளுமன்றத்தில் அமர்வின் போது, நாம் தமிழர் கட்சியின் ஒருங்கிணைப்பாளர் சீமானைக் குறிப்பிட்டு, "ஆயுதம் இருந்திருந்தால் உன்னைச் சுட்டிருப்பேன்" எனப் பகிரங்கமாகக் கொலை மிரட்டல் விடுத்த விவகாரம் பெரும் சர்ச்சையை ஏற்படுத்தியுள்ளது.

ஒரு நாட்டின் நாடாளுமன்ற உறுப்பினர் அண்டை நாட்டு அரசியல் தலைவர் ஒருவருக்கு இவ்வாறு வன்முறையைத் தூண்டும் வகையில் பேசியது, தமிழகத்தில் பாமக நிறுவனர் ராமதாஸ் உள்ளிட்ட பல தலைவர்களாலும், பொதுமக்களாலும் கடுமையாகக் கண்டிக்கப்பட்டுள்ளது. அவர் மன்னிப்புக் கேட்க வேண்டும் என்ற கோரிக்கைகளும் வலுத்து வருகின்றன. 

லங்கா4 (Lanka4)

(வீடியோ இங்கே )