குற்றவாளிகளுக்குக் கருணை இல்லை: வித்யா வழக்கில் நீதியை நிலைநாட்டிய உயர்நீதிமன்றம்.
முழு இலங்கையையும் உலுக்கிய யாழ்ப்பாணம் புங்குடுதீவு மாணவி சிவலோகநாதன் வித்யா படுகொலை வழக்கில், ‘சுவிஸ் குமார்’ உள்ளிட்ட நான்கு குற்றவாளிகளுக்கு விதிக்கப்பட்ட மரண தண்டனையை உயர்நீதிமன்றம் இன்று (மே 06) உறுதிப்படுத்தியுள்ளது.
9 ஆண்டுகால சட்டப் போராட்டம் கடந்த 2015ஆம் ஆண்டு மே மாதம் 13ஆம் திகதி, பாடசாலைக்குச் சென்று திரும்பிக் கொண்டிருந்த 18 வயதுடைய மாணவி வித்யா கடத்திச் செல்லப்பட்டு, கூட்டுப் பாலியல் வன்கொடுமைக்கு உட்படுத்திக் கொலை செய்யப்பட்டார்.
இந்தச் சம்பவம் தொடர்பில் யாழ்ப்பாணம் மூவரடங்கிய மேல் நீதிமன்ற நீதிபதிகள் குழாம் (Trial-at-Bar) 2017ஆம் ஆண்டு வழங்கிய தீர்ப்பில், சுவிஸ் குமார் உள்ளிட்ட 7 பேருக்கு மரண தண்டனை விதிக்கப்பட்டது. தங்களுக்கு விதிக்கப்பட்ட மரண தண்டனையிலிருந்து விடுவிக்கக் கோரி குற்றவாளிகள் தரப்பில் மேன்முறையீடு செய்யப்பட்டிருந்தது.
இந்த மனுவை விசாரித்த பிரதம நீதியரசர் பிரீதி பத்மன் சூரசேன தலைமையிலான ஐவரடங்கிய உயர்நீதிமன்ற நீதியரசர்கள் குழாம் இன்று தனது இறுதித் தீர்ப்பை அறிவித்தது.
முக்கியக் குற்றவாளியான சுவிஸ் குமார் உள்ளிட்ட நான்கு பேருக்கு விதிக்கப்பட்ட மரண தண்டனையை உயர்நீதிமன்றம் உறுதி செய்தது. போதிய ஆதாரங்கள் இன்மை அல்லது ஏனைய சட்ட காரணங்களால் இரு குற்றவாளிகளின் தண்டனையை இரத்து செய்து அவர்களை விடுவிக்க நீதிமன்றம் உத்தரவிட்டது. மேன்முறையீட்டு விசாரணை காலப்பகுதியில் ஏற்கனவே ஒரு குற்றவாளி உயிரிழந்துள்ளார்
என்பது குறிப்பிடத்தக்கது. தொழில்நுட்ப வாயிலாக விசாரணை சிறைச்சாலையில் உள்ள குற்றவாளிகளில் மூவர் ‘சூம்’ (Zoom) தொழில்நுட்பம் ஊடாக நீதிமன்ற நடவடிக்கைகளில் முன்னிலைப்படுத்தப்பட்டனர்.
யாழ்ப்பாணத்தில் பெரும் அதிர்வலைகளை ஏற்படுத்திய இந்த வழக்கின் இறுதித் தீர்ப்பு, பாதிக்கப்பட்ட வித்யாவின் குடும்பத்தினருக்கும், நீதி வேண்டிப் போராடிய மக்களுக்கும் ஒரு முக்கியமான மைல்கல்லாகக் கருதப்படுகிறது.
ஒன்பது ஆண்டுகளுக்குப் பிறகு இந்தச் சட்டப் போராட்டம் இன்றுடன் ஒரு முடிவுக்கு வந்துள்ளது.
(வீடியோ இங்கே )
இச்செய்திக்கு பிரதான அனுசரணை
வீடியோ இங்கே
இது தொடர்பா வேற என்னலாம் நடந்திருக்குனு தெரிஞ்சுக்கலாமா?
சிறப்பு கட்டுரை
சினிமா செய்திகள்
வர்த்தக வியாபாரங்கள்
இலங்கை மாவட்ட செய்திகள்
