வைத்தியர்களுக்கும் சனிக்கிழமை விடுமுறை? - அரசாங்கத்திடம் மருத்துவ சங்கங்கள் விடுத்த வேண்டுகோள்.

நாட்டில் நிலவும் எரிபொருள் நெருக்கடி மற்றும் அதீத விலை உயர்வு காரணமாக சுகாதாரத் துறையினர் கடும் பாதிப்புக்குள்ளாகியுள்ள நிலையில், சனிக்கிழமைகளை மருத்துவர்களுக்கான உத்தியோகபூர்வ விடுமுறை தினமாக அறிவிக்குமாறு மருத்துவ நிபுணர்கள் சங்கம் (AMS) அரசாங்கத்திடம் அவசர கோரிக்கை விடுத்துள்ளது.

இது தொடர்பாக அந்தச் சங்கம் வெளியிட்டுள்ள அறிக்கையில் பின்வரும் முக்கிய விடயங்கள் சுட்டிக்காட்டப்பட்டுள்ளன. குறிப்பாக வெளிமாவட்ட மருத்துவமனைகளில் பணியாற்றும் மருத்துவ நிபுணர்கள், ஒரு நாளைக்கு பலமுறை நீண்ட தூரம் பயணிக்க வேண்டியுள்ளது. 

தற்போதைய எரிபொருள் தட்டுப்பாடு மற்றும் விலை உயர்வால் இவர்களது போக்குவரத்துச் செலவுகள் கட்டுப்படியாகாத நிலையை எட்டியுள்ளன.

தற்போதைய சூழலில் சுகாதாரச் சேவைகளைத் தடையின்றி முன்னெடுப்பதற்கு, வாராந்த வேலை நாட்களை மீளமைத்து, சனிக்கிழமையை விடுமுறை தினமாக அறிவிப்பது அவசியமாகும்.

ஏனைய அரச துறை ஊழியர்களுக்கு எரிபொருள் விலை உயர்வுக்கு ஏற்ப கொடுப்பனவுகள் வழங்கப்படுகின்ற போதிலும், மருத்துவ நிபுணர்களுக்கு போக்குவரத்துச் செலவுகளுக்காகப் போதுமான இழப்பீடுகள் வழங்கப்படுவதில்லை என மருத்துவ நிபுணர்கள் சங்கம் அதிருப்தி வெளியிட்டுள்ளது.

தூர பிரதேசங்கள் மற்றும் பின்தங்கிய பகுதிகளில் பணியாற்றும் மருத்துவர்கள் மத்தியில் இந்தச் சூழல் பெரும் அதிருப்தியை ஏற்படுத்தியுள்ளது. 

இதற்கு உடனடித் தீர்வு காணப்படாவிட்டால், விசேட மருத்துவ சேவைகள் பாதிக்கப்படக்கூடும் என அச்சம் வெளியிடப்பட்டுள்ளது.

இந்த நெருக்கடிக்குத் தீர்வு காணும் வகையில் அதிகாரிகளுடன் அவசர கலந்துரையாடலை மேற்கொள்ளத் தயாராக இருப்பதாகவும், பொதுமக்களுக்கான சுகாதார சேவைகளை உறுதிப்படுத்த இது மிக அவசியமானது என்றும் அந்த சங்கம் மேலும் தெரிவித்துள்ளது.

செய்திகளை அறிய தொடர்ந்தும் https://www.lanka4.com/ ஊடகத்துடன் இணைந்திருங்கள்

இச்செய்திக்கு பிரதான அனுசரணை

வீடியோ இங்கே