இலங்கையின் பொருளாதாரத்தை மீட்க ஆதரவளிப்பதாக ஜப்பான் உறுதி

இலங்கையின் பொருளாதாரத்தை மீட்பதற்கு தமது நாடு தொடர்ந்து ஆதரவளிக்கும் எனத் தெரிவித்த ஜப்பான் பாராளுமன்றத்தின் வெளிவிவகார பிரதி அமைச்சர் கொமுர மசாஹிரோ, குறுகிய காலத்தில் பொருளாதாரத்தை ஸ்திரப்படுத்தி மேலும் முன்னேற்றத்தை எட்டியதற்காக அரசாங்கத்தைப் பாராட்டினார்.

 அரசாங்கம் மேற்கொண்டுள்ள கட்டமைப்பு சீர்திருத்தங்கள் வெளிநாட்டு முதலீட்டுக்கு சாதகமான சூழலை மேம்படுத்தும் என அவர் நம்பிக்கை தெரிவித்தார்.

 இந்து சமுத்திர நாடுகளின் கூட்டமைப்பில் பங்கேற்பதற்காக இலங்கைக்கு விஜயம் செய்த ஜப்பானிய வெளிவிவகார அமைச்சர், பிரதமர் தினேஷ் குணவர்தனவுடனான சந்திப்பின் போது, ​​இருதரப்பு ஒத்துழைப்பு தொடர்பாக இலங்கை தலைவர்களுடன் இணைந்து செயற்பட வாய்ப்பு கிடைத்ததாக தெரிவித்தார். 

 இந்தியப் பெருங்கடல் விளிம்பு நாடுகளின் சங்கத்தின் தலைவராக தனது இரண்டு வருட பதவிக் காலத்தில் இலங்கைக்கு முழுமையான ஆதரவை வழங்குவதாக அவர் உறுதியளித்தார்.

 இந்தியப் பெருங்கடலின் கடல் பாதைகளின் மூலோபாய குறுக்கு வழியில் இலங்கை அமைந்துள்ளது என்றும், சுதந்திரமான மற்றும் திறந்த இந்தோ-பசிபிக் கொள்கையை அடைவதில் முக்கிய பங்காளியாக உள்ளதாகவும் குறிப்பிட்ட பிரதமர், இரு நாடுகளுக்கும் இடையே பொதுவான ஒத்துழைப்பின் முக்கியத்துவத்தை வலியுறுத்தினார். 

 காசா பகுதியில் மோதல்கள் அதிகரித்து வருவது குறித்து ஆழ்ந்த கவலையை தெரிவித்த பிரதமர், கோவிட் தொற்றுநோய் உலகளாவிய பொருளாதார வீழ்ச்சியை ஏற்படுத்தியுள்ளது என்றும், போர் மோதலால் உலகம், குறிப்பாக வளரும் நாடுகள், இதுபோன்ற மற்றொரு பேரழிவை எதிர்கொள்ள முடியாது என்றும் கூறினார். 

மோதலில் ஈடுபட்ட இரு தரப்பினரும் வன்முறையை உடனடியாக நிறுத்துமாறு கேட்டுக் கொண்டார்.

 கடன் மறுசீரமைப்பு நடவடிக்கையில் இலங்கைக்கு வழங்கிய ஆதரவிற்கு ஜப்பானிய அமைச்சருக்கு நன்றி தெரிவித்த பிரதமர், வெளிப்படையான மற்றும் சமநிலையான கடன் மறுசீரமைப்புச் செயன்முறைக்கு இலங்கை அர்ப்பணிப்புடன் இருப்பதாக உறுதியளித்தார்.

 சர்வதேச நாணய நிதியத்துடன் செய்து கொள்ளப்பட்ட உடன்படிக்கையின் பிரகாரம் கொள்கை வகுக்கும் இலங்கையின் முயற்சிகளை பாராட்டிய ஜப்பானிய அமைச்சர் கொமுர மசாஹிரோ, கூடிய விரைவில் இலங்கை முழுமையான அபிவிருத்திக்கான சரியான பாதையில் பிரவேசிக்கும் என எதிர்பார்ப்பதாக தெரிவித்தார்.