கறுப்பு புகையை வெளியிடும் வாகனங்களை சோதனைக்கு உட்படுத்த புதிய திட்டம்!

கறுப்பு புகையை வெளியிடும் வாகனங்களை சோதனையிட மாசு வெளியேற்ற நிதியத்தால் புதிய திட்டம் தொடங்கப்பட்டுள்ளதாக அறிவிக்கப்பட்டுள்ளது.  

வாகனங்களில் இருந்து வெளியேறும் கார்பன் மோனாக்சைடு, நைட்ரஜன் டை ஆக்சைடு மற்றும் தூசி துகள்கள் போன்ற தீங்கு விளைவிக்கும் வாயுக்களால் மக்கள் புற்றுநோய், சுவாசக் கோளாறு போன்ற நோய்களுக்கு ஆளாவதாக சுகாதாரத் துறையினர் தொடர்ந்து சுட்டிக் காட்டுவதாக மோட்டார் போக்குவரத்துத் திணைக்களம் தெரிவித்துள்ளது. 

தரவு அறிக்கைகளின்படி, நாளொன்றுக்கு சுமார் 70 இலட்சம் வாகனங்கள் வீதிகளில் பயணிக்கின்றன. கொழும்பு நகரில் மாத்திரம் நாளாந்தம் பயணிக்கும் வாகனங்களின் எண்ணிக்கை சுமார் ஒரு மில்லியன் ஆகும். இவற்றில் 30% வாகனங்கள் கறுப்பு புகையை வெளியிடுவதாக தெரியவந்துள்ளதாகவும் மோட்டார் போக்குவரத்து திணைக்களம் குறிப்பிடுகிறது. 

இதன்படி, அதிக கறுப்பு புகையை வெளியிடும் லாரிகள், பேருந்துகள் மற்றும் பிற வாகனங்கள் தொடர்பாக, காற்று மாசு நிதியத்தின் 070 3500 525 என்ற வாட்ஸ்அப் எண்ணுக்கு புகார் தெரிவிக்க முடியும் எனத் தெரிவிக்கப்பட்டுள்ளது. 

விதிகளை பின்பற்றாத சம்பந்தப்பட்ட வாகனங்களின் வருவாய் உரிமத்தை கருப்பு பட்டியலில் சேர்க்க நடவடிக்கை எடுக்கப்படும். இத்தகைய தடுப்புப்பட்டியலில் உள்ள வாகனங்களை மற்றொரு நபருக்கு விற்கவோ அல்லது மாற்றவோ முடியாது எனத் தெரிவிக்கப்பட்டுள்ளது.