வாட்ஸ் அப் மூலம் இளம் பெண்களின் நிர்வாண புகைப்படங்களை அனுப்பிய மாணவன் கைது

பிரபல மொடல் அழகிகளின் பெயரில் இரண்டு வாட்ஸ்அப் கணக்குகளை உருவாக்கி, மொடலிங் துறையில் வேலை வாங்கித் தருவதாகக் கூறி அழகான இளம் பெண்களின் நிர்வாண புகைப்படங்களை அனுப்பிய பாடசாலை மாணவர் ஒருவரை புலனாய்வுத் துறையின் கணினி குற்றப்பிரிவு பொலிஸார் கைது செய்தனர்.

 சமூக ஊடக குற்றப் புலனாய்வுப் பிரிவு இதனைத் தெரிவித்துள்ளது. கைது செய்யப்பட்ட சந்தேக நபர் 19 வயதுடைய உயர்தரப் பாடசாலை மாணவர் ஆவார். 

 சந்தேக நபர் தனது கணினியில் வாட்ஸ்அப் மூலம் அனுப்பிய இளம் பெண்களின் கிட்டத்தட்ட பதினைந்து நிர்வாண புகைப்படங்களை பொலிசார் கண்டுபிடித்துள்ளனர்.

 பிரபல நிறுவனங்களில் மொடலிங் துறையில் வேலை தேடும் அழகான யுவதிகளுக்கு வாய்ப்பு வழங்குவதாக மினுவாங்கொடை பிரதேசத்தைச் சேர்ந்த மாணவர் ஒருவர் பிரபல மொடல்கள் இருவரின் பெயர்களைப் பயன்படுத்தி போலியான வட்ஸ்அப் கணக்கை உருவாக்கி விளம்பரம் செய்துள்ளதாக பொலிஸார் தெரிவித்துள்ளனர்.

 சந்தேக நபர் யுவதிகளின் நிர்வாண புகைப்படங்களை மூலோபாயமாக பெற்று வருவதாக இலத்திரனியல் ஊடக நிறுவனம் ஒன்றின் ஊடாக தகவல் கிடைத்துள்ளதாக சிரேஷ்ட பொலிஸ் அதிகாரி ஒருவர் தெரிவித்தார்.

 சந்தேக நபர் ஒவ்வொரு சிறுமியுடனும் குறுஞ்செய்திகள் மூலம் தொடர்பில் இருந்ததாகவும் பொலிஸார் தெரிவிக்கின்றனர்.

 குற்றப் புலனாய்வுத் திணைக்களத்தின் கணினி குற்றப் புலனாய்வுப் பிரிவின் சிரேஷ்ட பொலிஸ் அத்தியட்சகர் லக்கி ரந்தெனிய அவர்களின் பணிப்புரையின் பேரில் சமூக ஊடக குற்றப் புலனாய்வுப் பிரிவின் நிலையத் தளபதி பொலிஸ் பரிசோதகர் பி.வி.ஐ. கயஸ்ரீ தலைமையில் விசாரணைகளை ஆரம்பித்து சந்தேக நபர் கைது செய்யப்பட்டதாக பொலிஸார் தெரிவித்தனர்.

 சந்தேகத்திற்குரிய பாடசாலை மாணவர் நீதிமன்றில் முன்னிலைப்படுத்தப்படவுள்ளார்.