எக்ஸ்பிரஸ் பேர்ல் கப்பல் தொடர்பில் வெளியான தகவல்: சிங்களப் பெயருடைய கணக்கில் 250 மில்லியன் டொலர்கள்

கொழும்பு துறைமுகத்திற்கு அருகில் தீயில் எரிந்து நாசமான எக்ஸ்பிரஸ் பேர்ல் கப்பல் தொடர்பான வழக்கு மற்றும் நட்டஈடு நடவடிக்கைகளை சீர்குலைப்பதற்காக இலங்கையில் அதிகாரி ஒருவருக்கு இலஞ்சம் பெற்றதாக எழுந்த குற்றச்சாட்டு தொடர்பில் விசாரணைகளை ஆரம்பிக்குமாறு பணிப்புரை விடுக்கப்பட்டதாக நீதி அமைச்சர் விஜேதாச ராஜபக்ஷ தெரிவித்துள்ளார்.

மே 20, 2021 அன்று, இந்தியாவின் ஹசிரா துறைமுகத்திலிருந்து வந்த எக்ஸ்பிரஸ் பேர்ல், மே 20 அன்று கொழும்பு துறைமுகத்திற்கு அருகே தீப்பிடித்தது.

கப்பலில் நைட்ரிக் அமிலம் மற்றும் பிற இரசாயனங்கள் அடங்கிய 1,486 கொள்கலன்கள் இருந்தன, அவற்றில் பல தீப்பிடித்து மேலும் பல கொள்கலன்கள் மூழ்கின.

இது நீர்கொழும்புக்கு அருகிலுள்ள கடல் கடற்கரை மற்றும் சுற்றுச்சூழல் அமைப்பிற்கு பாரிய சேதத்தை ஏற்படுத்தியது.

அந்த சேதம் தொடர்பில், கப்பல் நிறுவனத்திடம் இருந்து 6.2 பில்லியன் அமெரிக்க டொலர் நஷ்டஈடு கிடைக்க வாய்ப்புள்ள போதிலும் ஏன் இதுவரை வழக்குத் தாக்கல் செய்யவில்லை என பல தரப்பினரும் அரசாங்கத்திடம் கேள்வி எழுப்பினர்.

நிபுணர்களின் கூற்றுப்படி, இது தொடர்பான வழக்கு விசாரணைக்கு இன்னும் 32 நாட்கள் மட்டுமே உள்ளன.

நிபுணர்கள் மத்தியில் சந்தேகத்தை எழுப்பிய மற்றொரு விஷயம், இலங்கையில் வழக்குத் தொடுப்பதன் மூலம் அதிக லாபம் பெற முடியும் என்ற நிலையில், சிங்கப்பூரில் வழக்குத் தொடர அதிகாரிகள் ஏன் முடிவு செய்தனர்.

இதன்போதே நீதியமைச்சர் விஜேதாச ராஜபக்ஷவும் கப்பலின் விசாரணை மற்றும் வழக்கு விசாரணை தொடர்பில் சர்ச்சைக்குரிய கருத்தை வெளியிட்டிருந்தார்.

கப்பலின் காப்புறுதி நிறுவனம் இலங்கையில் உள்ள அதிகாரி ஒருவருக்கு கப்பலுக்கு எதிரான வழக்குத் தொடுப்பு மற்றும் நட்டஈடு வழங்குவதைக் குறைப்பதற்காக 250 மில்லியன் அமெரிக்க டொலர்களை இலஞ்சமாக வழங்கியதாக தமக்கு தகவல் கிடைத்துள்ளதாக அமைச்சர் குறிப்பிட்டார்.

நீதி அமைச்சர் விஜேதாச ராஜபக்ஷ மேலும் தெரிவிக்கையில்,

“இதை ஒடுக்க சில தரப்பினர் லஞ்சம் வாங்கியதாக எனக்கு தொடர்ந்து சில தரப்பு தகவல்கள் தெரிவிக்கப்பட்டன.

எனக்குக் கிடைத்த தகவலின்படி, இங்கிலாந்தில் உள்ள வங்கி ஒன்றில் சிங்களப் பெயர் கொண்ட ஒருவரின் கணக்கில் 250 மில்லியன் டொலர்கள் வரவு வைக்கப்பட்டுள்ளது. 

இது ஒரு தீவிரமான விஷயம். பொலிஸ் மா அதிபர் மற்றும் குற்றப் புலனாய்வுப் பிரிவின் பிரதிப் பொலிஸ் மா அதிபர் ஆகியோரிடம் அன்றைய தினம் கையளிக்கப்பட்டுள்ளது. தற்போது விசாரணைகள் தொடங்கப்பட்டு நடைபெற்று வருகின்றன” என்றார்.

இதேவேளை, இந்தக் குற்றச்சாட்டுகள் தொடர்பில் விசாரணை நடத்துமாறு கடல் சுற்றாடல் அதிகார சபையின் அதிகாரிகள் இன்று குற்றப் புலனாய்வு திணைக்களத்தில் முறைப்பாடு செய்துள்ளனர்.

கப்பல் விபத்து தொடர்பில் உரிய விசாரணை நடத்தப்பட வேண்டும் என இலஞ்சம் மற்றும் ஊழலுக்கு எதிரான குடியுரிமை அமைப்பு இலஞ்ச ஊழல் விசாரணை ஆணைக்குழுவிடம் இன்று முறைப்பாடு செய்திருந்தது.