ஆந்திராவில் மின்சார ரம்பத்துடன் வகுப்பறைக்குள் புகுந்து தாக்குதல் நடத்திய 21 வயது இளைஞர்

ஆந்திரப் பிரதேசத்தின் அனந்தபூர் மாவட்டம், ராப்தாடு மண்டலத்தில் உள்ள ஒரு அரசுப் பள்ளியில் 21 வயது இளைஞர் ஒருவர் மின்சார ரம்பத்துடன் (power saw) பத்தாம் வகுப்பு வகுப்பறைக்குள் நுழைந்து அங்குள்ள இரு மாணவிகளைத் தாக்கியுள்ளார்.

இதில் இருவரும் காயமடைந்தனர், அவர்களில் ஒருவரின் நிலை கவலைக்கிடமாக உள்ளதாக தெரிவிக்கப்பட்டுள்ளது.

இந்தச் சம்பவம் ராப்தாடு கிராமத்தில் உள்ள ஜில்லா பரிஷத் உயர்நிலைப் பள்ளியில் நிகழ்ந்துள்ளது. 

ஆசிரியர் பாடம் நடத்திக்கொண்டிருந்தபோதே, வகுப்பறைக்குள் இந்தத் தாக்குதல் நடந்துள்ளது.

காயமடைந்த இரு மாணவிகளும் அவசர சிகிச்சைக்காக உடனடியாக அனந்தபூரில் உள்ள அரசு பொது மருத்துவமனைக்குக் கொண்டு செல்லப்பட்டனர்.

காவல்துறையின் முதற்கட்டத் தகவலின்படி, குற்றம் சாட்டப்பட்டவர் ஹேமந்த் என்கிற 'டம்மு' (Dummu) என்று அடையாளம் காணப்பட்டுள்ளார்.

இவர் தர்மாவரம் நகரத்தைச் சேர்ந்தவர் என்று கூறப்படுகிறது. தாக்குதல் நடத்திய பிறகு, அவர் பள்ளியிலிருந்து தப்பி ஓடிவிட்டார். அவர் இன்னும் பிடிபடவில்லை; அவரைத் தேடும் பணி தீவிரப்படுத்தப்பட்டுள்ளது.