IPL RETENSION : 8 அணிகள் - யார் யாரை தக்கவைத்துள்ள விபரம்?

Prasuat month ago

அடுத்த ஆண்டுமுதல் புதிதாக அகமதாபாத், லக்னோ அணிகள் இணைக்கப்பட்டு, மொத்தம் 10 அணிகள்வரை ஐபிஎலில் பங்கேற்கவுள்ளது. புதிய இரண்டு அணிகள் சேர்க்கப்படுவதால், அந்த அணிகளுக்கு வீரர்களை தேர்வு செய்யும்விதமாக 15ஆவது சீசனுக்கு முன்பு மெகா ஏலம் நடைபெறவுள்ளது. இதனால், ஒரு அணி 3 உள்நாட்டு வீரர்கள் + ஒரு வெளிநாட்டு வீரர் அல்லது தலா இரண்டு உள்,வெளிநாட்டு வீரர்களை தக்கவைத்துக்கொள்ளலாம் என பிசிசிஐ சமீபத்தில் அதிகாரப்பூர்வமாக அறிவித்தது

வீரர்கள் தக்கவைப்பு:

இந்நிலையில் தற்போது எந்தெந்த அணிகள் யார் யாரை தக்கவைத்துள்ளது என்பது குறித்த அதிகாரப்பூர்வ அறிவிப்பு தற்போது வெளியாகியுள்ளது.

ராயல் சேலஞ்சர்ஸ் பெங்களூர் அணி- விராட் கோலி (15 கோடி), கிளென் மேக்ஸ்வெல் (11 கோடி), முகமது சிராஜ் (7 கோடி) ஆகியோரை மட்டுமே தக்கவைத்துள்ளது. நான்காவது நபரை தக்கவைக்கவில்லை. யுஜ்வேந்திர சாஹலை ஏலத்தின்போது எடுப்போம் என அந்த அணி நிர்வாகம் ட்வீட் மூலம் தெரிவித்துள்ளது.

மும்பை இந்தியன்ஸ்- அணி ரோஹித் ஷர்மா (16 கோடி), ஜஸ்பரீத் பும்ரா (12 கோடி), கெய்ரன் பொல்லார்ட் (6 கோடி), சூர்யகுமார் யாதவ் (8 கோடி) ஆகியோரை தக்கவைத்துள்ளது. பாண்டியா சகோதரர்கள், இஷான் கிஷன், டிரன்ட் போல்ட் போன்றவர்களை தக்கவைக்கவில்லை.

பஞ்சாப் கிங்ஸ் அணி- மயங்க் அகர்வால் (14 கோடி), அர்ஷ்தீப் சிங் (4 கோடி) ஆகியோரை தக்கவைத்துள்ளது. இதன்மூலம் கே.எல். ராகுல் லக்னோ அணிக்கு செல்லவுது கிட்டதட்ட உறுதியாகிவிட்டதாக கூறபட்டுகிறது. அந்த அணிக்கு 72 கோடி மீத தொகை இருக்கிறது.

சன் ரைசர்ஸ் ஹைதராபாத் அணி- கேன் வில்லியம்சன் (14 கோடி), அப்துல் சமத் (4 கோடி), உம்ரான் மாலிக் (4 கோடி) ஆகியோரை மட்டும் தக்கவைத்துள்ளது. இதன்மூலம், ரஷித் கான் லக்னோ அணிக்கு செல்வது கிட்டதட்ட உறுதியாகியுள்ளது. தமிழக பௌலர் நடராஜனுக்கு இடம் வழங்கப்படவில்லை.

சென்னை சூப்பர் கிங்ஸ் அணி- ரவீந்திர ஜடேஜா (16 கோடி), மகேந்திரசிங் தோனி (12 கோடி), மொயின் அலி (8 கோடி), ருதுராஜ் கெய்க்வாட் (6 கோடி) ஆகியோரை தக்கவைத்துள்ளது. சுரேஷ் ரெய்னா, ஃபாஃப் டூ பிளஸியை விடுவித்துள்ளது.

டெல்லி கேபிடல்ஸ் அணி- ரிஷப் பந்த் (16 கோடி), அக்சர் படேல் (9 கோடி), பிரித்வி ஷா (7.5 கோடி), ஆன்ரிக் நோர்க்கியா (6.5 கோடி) ஆகியோரை தக்கவைத்துள்ளது. ஷ்ரேயஸ் ஐயர், ரவிச்சந்திரன் அஸ்வின் போன்றவர்களை தக்கவைக்கவில்லை.

கொல்கத்தா நைட் ரைடர்ஸ் அணி- ஆண்ட்ரே ரஸல் (12 கோடி), வருண் சக்ரவர்த்தி (8 கோடி), வெங்கடேஷ் ஐயர் (8 கோடி), சுனில் நரைன் (6 கோடி) ஆகியோரை தக்கவைத்துள்ளது. கேப்டன் இயான் மோர்கன், ஷுப்மன் கில் ஆகியோரை தக்கவைக்கவில்லை.

ராஜஸ்தான் ராயல்ஸ் அணி- சஞ்சு சாம்சன் (14 கோடி), ஜாஸ் பட்லர் (10 கோடி), யாஷஸ்வி ஜெய்ஷ்வால் (4 கோடி) ஆகியோரை தக்கவைத்துள்ளது.